Зорлық-зомбылықсыз 16 күн
191 Views
Жыл сайын 25 қараша мен 10 желтоқсан аралығында әлем бойынша «Гендерлік зорлық-зомбылыққа қарсы 16 күн белсенді іс-әрекет» халықаралық акциясы өткізіледі. Бұл БҰҰ-ның бастамасымен әйелдерге және қыз балаларға қатысты зорлық-зомбылықты жоюға бағытталған.
Акция аясында еліміздің барлық өңірлерінде, оның ішінде Жамбыл облысында да түрлі форматтағы іс-шаралар ұйымдастырылуда. Оның мақсаты – отбасы мен әйел адамға қатысты зорлық-зомбылықтың кез келген түріне төзбеушілікті қалыптастыру, құқықтық сауаттылықты арттыру және азаматтарды өз құқығын қорғауға үндеу.
Полиция қызметкерлері, үкіметтік емес ұйымдар мен әлеуметтік сала мамандары бірлесе отырып, білім беру мекемелерінде, мемлекеттік органдарда, халықпен кездесулер өткізіп, түсіндіру жұмыстарын жүргізуде. Бұл шаралар қоғамда қауіпсіз әрі зорлық-зомбылықсыз өмір салтын насихаттауға бағытталған.
Гендерлік зорлық-зомбылық – тек жекелеген адамдардың емес, бүкіл қоғамның мәселесі. Сондықтан мұндай акциялар әр азаматтың бей-жай қарамауына, құқық бұзушылыққа жол бермеуге және зорлық-зомбылықтың алдын алуға үлкен септігін тигізеді.
Қоғамдық қауіпсіздік пен отбасы амандығы – ортақ міндет. Бейбіт, зорлық-зомбылықсыз болашақ үшін бірге атсалысайық!
Аудандық полиция бөлімі.