150-ге жуық маман қатысқан форум

83 Views

Жақында, яғни қарашаның 26-сы күні Тараз қаласындағы №66 орта мектепте «Адал азамат: құндылық, инновация, тәжірибе» тақырыбында форум өтті. Форумға облыстың білім бөлімдері мен білім беру ұйымдарының басшылары, әдіс­керлер, тәрбие ісі жөніндегі директор орынбасарлары, педагогтер және барлығы 150-ге жуық маман қатысты. Іс-шарада білім саласындағы өзекті мәселелер мен өнегелі ұрпақты тәрбиелеуге бағытталған өңірлік тәжірибелер жан-жақты талқыланды.

Іс-шараға Қазақстанның еңбек сіңірген қайраткері, Еңбек Ері Аягүл Төреқызы Миразова да қатысып, өз тәжірибесімен бөлісіп, ұрпақ тәрбиесіндегі ұстаз тұлғасының маңыздылығын ерекше атап өтті. Оның мазмұнды ойлары қатысушыларға зор рухани серпін берді. Форум «Құндылықтар керуені» атты тәжірибелік-презентациялық көрмемен ашылды. Көрмеде өңірдегі  мектептердің рухани тәрбие бағытындағы үздік жобалары, ұлттық дәстүрді дәріптеуге арналған әдістемелік жұмыстар мен инновациялық бастамалар таныс­ты­рыл­ды. Сонымен бірге біздің, яғни Өнер мектебінің директоры Утебаев Бақытжан Оңғарұлының басшылығымен  мектеп ұжымы өз жұмыстарын көрмеге ұсы­нып, ал,  қолөнер бөлімінің ұс­тазы Татаев Жанай Косылғанұлы шәкірт­терімен бірлесіп шеберлік сынып өткі­зіп, шығармашылық жұмыстарын көп­шілікке ұсынды. Шеберлік сабағына қатыс­қан қонақтар мен мұғалімдер Жанай Косылғанұлының тәжірибесімен бөлісу мүмкіндігіне ие болды. Оның ұлттық қолөнерді заманауи бағыт­тармен ұштастыра отырып өткізген үйрету әдісі қатысушыларға ерекше әсер қалдырды. Шара барысында қонақтар оқушылардың қолынан шық­қан бұйымдардың сапасы мен көркемдік деңгейін жоғары бағалап, олардың шығармашылық өнеріне тәнті болды.

Форум соңында ұстаз бен оның тәрбиеленушілеріне арнайы алғыс хаттар табысталып, өңір ішінде ғана емес, республика көлемінде де өнерге қосқан үлестері атап өтілді. Еңбек Ері Аягүл Миразова оқушыларға ризашылығын білдіріп, олардың талпынысы мен білімге деген ынтасы елдің жарқын болашағына негіз болатынын атап өтті. Бұл – ауданымыздың мәдени жетістігін паш еткен маңызды сәттердің бірі болып, жас шеберлерге жаңа шабыт пен сенім сыйлады.

Шолпан Жайлауқызы,

Өнер мектебінің бұқаралық бөлім меңгерушісі.

 

Поделиться ссылкой: