Жаһандану дәуірінде ұлттық құндылықтарды сақтау

Қазіргі таңда жаһандану үдерісі әлемнің барлық елдеріне әсер етуде. Ақпараттық технологиялардың дамуы, интернеттің кең таралуы және мәдениеттер арасындағы байланыстың күшеюі адамдардың өмір салтын өзгертті. Мұндай жағдайда әр халық өзінің ұлттық болмысын, тілін, дәстүрін және мәдениетін сақтауға ерекше көңіл бөлуі қажет. Интернет пен әлеуметтік желілердің арқасында адамдар әлемнің кез келген нүктесіндегі жаңалықтармен лезде таныса алады. Мұның бәрі адамзаттың дамуына оң әсерін тигізгенімен, әр халықтың ұлттық ерекшелігі мен рухани құндылықтарын сақтауға деген жауапкершілікті де арттыра түсуде.

Ұлттық құндылықтар – халықтың ғасырлар бойы қалыптасқан рухани мұрасы. Оған ана тілі, салт-дәстүр, әдет-ғұрып, ұлттық тәрбие және мәдениет жатады. Бұл құндылықтар ұлттың ерекшелігін айқындап, келер ұрпаққа бағыт-бағдар береді. Жаһандану бір жағынан жаңа мүмкіндіктер ашса, екінші жағынан ұлттық ерекшеліктердің әлсіреу қаупін тудырады. Әсіресе жастар шетелдік мәдениетке еліктеп, өз халқының дәстүрлері мен құндылықтарын ұмытып кетуі мүмкін. Сондықтан ұлттық сананы қалыптастыруда отбасының, мектептің және қоғамның рөлі өте маңызды. Ұлттық құндылықтарды сақтау үшін ең алдымен ана тілімізді құрметтеуіміз керек. Тіл – ұлттың жаны. Сонымен қатар ұлттық мерекелерді дәріптеу, салт-дәстүрлерді насихаттау және тарихи мұраларды қорғау да маңызды міндеттердің бірі болып табылады. Жастарға ұлттық тәрбие беру арқылы біз олардың бойында отансүйгіштік пен елжандылық қасиеттерді қалыптастыра аламыз.
Ұлттық құндылықтарды сақтаудың маңызды жолдарының бірі – ана тілімізді дамыту. Қазақ тілі – халқымыздың рухани қазынасы. Тілді құрметтеу арқылы біз ұлттық мәдениетімізді, әдебиетімізді және тарихымызды сақтаймыз. Сонымен қатар ұлттық мерекелерді атап өту, дәстүрлі өнерді насихаттау, тарихи орындарды қорғау да ұлттық мұраны сақтауға үлес қосады. Қазіргі кезде мемлекет тарапынан да ұлттық құндылықтарды дәріптеуге бағытталған көптеген бағдарламалар жүзеге асырылуда. Бұл жұмыстар жастардың ұлттық сана-сезімін нығайтып, өз елінің тарихы мен мәдениетіне деген құрметін арттыруға ықпал етеді.
Өз мәдениетін, тілін және дәстүрін құрметтеген халық қана болашақта өзінің ұлттық болмысын жоғалтпай, дамудың даңғыл жолымен алға басады. Әлемдік дамудан қалыс қалмай, сонымен бірге өз тілімізді, мәдениетімізді, салт- дәстүрімізді сақтай білуіміз қажет. Ұлттық құндылықтарын құрметтеген халық қана өзінің болашағын баянды етіп, тәуелсіздігін нығайта алады.
Б.ТӨРЕБАЙ,
«Жастар ресурстық орталығы» КММ-нің Қорағаты ауылдық округінің жастармен жұмыс жөніндегі маманы.

Поделиться ссылкой: