Құрманбекова Құланға келді

1 028 Views

Сәрсенбі күні облыс әкімінің орын­басары Сұлушаш Құрманбекова жұмыс сапарымен ауданға келді. Әуелі Жалпақ­саз ауылында жаңадан салын­ған 48 орындық бастауыш мектептің жаңа оқу жылына дайындығын пы­сықтап, мектеп меңгерушісі Гүлзина Сатылғанованы сұрақтың астына ал­ды. Төрт оқу кабинетінен тұратын мек­тепте биыл даярлық тобын қосқанда 53 оқушы оқиды. Заманауи үлгіде салынған мектептің іші-сыртын түгел аралап көріп, аудан әкімі аппараты­ның басшысы Әлібек Терлікбаев пен аудандық білім бөлімінің сектор мең­герушісі Бауыржан Самылтыровқа қабылдау актісін кешіктірмеу керекті­гін ескертті. «Енді бір он бес күнде оқу жылы басталады. Мектеп құрылысы толықтай дайын екен. Меніңше, мек­тепті осы бастан қабылдап, оқу жылына дайындықты жасау керек» деген Сұлушаш Сәтбекқызы келесі кезекте округ орталығы Каменка ауылында орналасқан Бауыржан Момышұлы атындағы орта мектепке барды. Күр­делі жөндеуді қажет ететін мектепке көр­ші Жалпақсаз, Тасшолақ ауылдары­ның жоғары сынып оқушылары тасмалданып оқытылады.
– Мектеп 1968 жылы салынған, бірақ пайдалануға 1970 жылы берілді,- дейді мектеп директоры Мұратжан Мейманханов. – Міне, көріп тұрғаныңыздай ғимарат тозып тұр. Мына тұрған терезелерге 50 жылдан асты, жылу ұстамайды. Басқа мектептер оқушыларды қыс айларында шатырдағы мұздан қорғаса, біз жыл он екі ай терезелер құлап кете ме деп қауіптенеміз. Жел тұрса қимылдап, зәремізді алады. Негізі, мектеп 2003 жылы күрделі жөндеуден өткен. Енді айтар атқа солай, әйтпесе шатыры мен терезелері ауысқан жоқ, — деп әңгіменің ашығына көшкен мектеп басшысы соңғы жеті жылдың көлемінде осымен екінші мәрте күрделі жөндеуге жобалық сметалық құжат дайындалғанын жеткізді. Бұл жөнінде білім бөлімінің сектор меңгерушісі Бауыржан Самылтыров жағымды жаңалығымен бөлісті. Сөзіне сенсек, қазіргі таңда күрделі жөндеу жүргізілуі тиіс 8 мектептің жобалық сметалық құжаты дайын. Соның ішінде осы Бауыржан Момышұлы атындағы орта мектеп бірінші кезекте жөндеуден өтеді. Білім ордасының жай-күйіне қаныққан облыс әкімінің орынбасары мектепке көрші ауылдардан қатынап оқитын оқушыларды тасымалдайтын автобустардың техникалық жағдайын да назардан тыс қалдырмады. Расында қоғамдық көліктердің сапасы сын көтермейтін болып шықты. Жиырма жылдан асып, отыз жылға таяған ескі автобустар шау тартқан шалдардың кейпін көз алдыңызға әкеледі.
Қарап отырсақ, аудандағы ең көп бала тасымалданатын мектеп Бауыржан Момышұлы екен. Мұнда биыл 132 оқушы көрші ауылдардан келеді. Оларды жеке кәсіпкер Қанат Мырзабаевтың иелігіндегі 4 қоғамдық көлік тасымалдайды. Ауыл әкімдігі ол үшін жылына 6,5 миллион теңге қаржы төлейді. Сұлушаш Сәтбекқызы ескі көліктердің сықпытынан шошып, сынға алды. «Таксиге мінсең де дені дұрысын таңдайсың ғой. Бұл жерде бала тағдыры тұр. Сондықтан тапсырыс беруші ретінде көліктің техникалық ерекшеліктеріне көңіл аударуың керек» деп ауыл әкімі Ораз Тәнкеевке жаңа көлік қарастыруды тапсырды.
«Нұр Отан» партиясы Тұрар Рысқұлов аудандық филиалының қоғам­дық қабылдау бөлмесінде аудан тұрғындарын қабылдаған облыс әкімінің орынбасары алдына келген әр азаматтың жағдайына жіті көңіл бөліп, тұрғындар көтерген түйткілдердің түйінін тарқату жолдарын қарастырды. Сегіз баланың әкесі, Абай ауылының тұрғыны Нұрлан Әбілдаев екінші топтағы мүгедек баласының мүгедектігі бойынша алатын жәрдемақысы кіріске есептеліп, атаулы әлеуметтік көмек ала алмай отырғанын, атаулы әлеуметтік көмек алуға ықпал етуін өтінсе, Құлан ауылының тұрғыны Ардақ Кенжеева атаулы әлеуметтік көмекке қол жеткізудің жолдарын сұрады. Құлан, Луговой, Каменка ауылдарынан келген өзге тұрғындар да Сұлушаш Құрманбекованың қабылдауында болып, жұмысқа тұра алмай жүргендерін жеткізді. Аталған мәселелерді заң шеңберінде шешуге тиісті сала мамандарына табыстаған өңір басшысының орынбасары тұр­ғындардың өтінішін назарда ұстап отыру үшін қойын дәптеріне түртіп алды.
Аудандық мәдениет үйінде орна­ласқан орталық­танды­рыл­ған кітап­ха­надағы «Coworking» орталы­ғы­мен танысқан Сұлушаш Сәтбекқызы қо­рытынды кез­десуін мәдениет үйіндегі «Рухани жаң­ғыру» жобалық офисінде «Диплом­мен ауылға» бағдарламасы аясын­да жұмысқа қабылданған жас маман­дар­мен және аудан жастарымен өткізді. Еркін пікір алмасу форматында өткен кездесуде әр салада жүрген аудан жас­тары өз ой пікірлерімен бөлісіп, бір­қатар ұсыныстарын алдыға тартты.

Мереке Ержанұлы.

Поделиться ссылкой: