Жылдамдықты асыру – ажалыңа асығу

«Egemen Qazaqstan» газетінің 28 қаңтар күнгі №17 санында «Жол апаты алдын алғанда ғана азаяды» атты мақала жарық көрген еді. Мақалада өткен жылы жол-көлік оқиғасынан 2 мыңнан астам адам қайтыс болып, 20445 адам жарақат алғаны жайында дерек бар. Бұл жөнінде мәжіліс депутаты Павел Казанцев ішкі істер министрлігіне сауал жолдапты. Мәжілісменнің дерегінше бейбіт күні тас жолда жан тапсырғандардың саны Ауғанстанда болған 10 жылдық соғыста бақилық болғандардан көп екен.

Биыл да елімізде жол-көлік оқи­ғалары жиілеп кетті. Күнде бір суыт хабарды естиміз. Адамдар топ-тобымен ажал құшып жатыр. Екі-үш күн алдын Алматы – Бішкек тас жолында орын алған қайғылы оқиға әлеуметтік же­лілер арқылы тарады. «Мазда-626» маркалы темір тұлпар мен жүк көлігі соқтығысып, салдарынан 5 адам қаза тапты. Қайтыс болғандардың үшеуі балалар. Тағы үш адам ауыр халде ау­ру­ханаға жеткізілген. Куәгерлердің айтуынша барлығы бір үйдің адамда­ры. Бұл бір ғана дерек. Осындай оқыс оқиғалар күн сайын тіркеледі. Салдары ауыр. Себебіне үңілген жан бар ма? Адамдардың көпшілігі темір тұлпар тізгіндеген жүргізушілердің көлікті қатты айдайтынын, жол ережесін жиі бұзатынын айтады. Күнде жолда жүрген соң, оны өзіміз де көріп жүрміз. Ережеге бағынбайтындар жетеді. Жол ережесін білмейтіндері қаншама? Бір-бір үйдің еркелері есекті ерттеп мінгендей темір тұлпарларды тақымдап алған. Соның бірін фототілшіміз таспаға тартыпты. Мемлекеттік нөмірі 981 КМА 08 «BMW» автокөлігі орталық алаңда ойқастап, елдің құтын қашырған. Көлі­гін шыр айналдырып мақтанған даңғойдың кім екенін анықтау құзыр­лы органдарға қиындық тудырмас.
Қазір ішімдік ішіп те көлік ай­дай­тындар көбейді. Үлкен жолдың бойын­да біріне бірі жол бермейтіндерді қай­те­міз. Жүйткіген көліктер полицияны көргенде ғана жылдамдықты азайта­ды. Осындайда өмір өзіміздікі екенін ұмытып кетеміз. Полиция үшін өмір сүріп жүргендейміз. Полицияның міндеті – қоғамдық тәртіпті сақтау. Біздің міндет жолда жүру мәдениетін сақтау болса, қанекей.
Жоғарыда жол-көлік оқиғасы көбейіп келеді дедік. Аудандық поли­ция бөлімі орын алған әрбір жол-көлік оқиғасына талдау жасап отыр. Өткен жылмен салыстырғанда биыл жол апаты артқан. Сандарды сөйлетейікші. 2018 жылдың жеті айында 41 жол-көлік оқиғасы тіркел­се, ағымдағы жылдың жеті айында 44 жол апаты орын алған. Былтыр 6 адам қайтыс болса, биыл 7 адам жер қойнына тап­сырылды. Жарақат алғандардың саны тіптен көп. 52 адамнан 92 адамға өскен. Қайғылы оқилардың дені ауыл ішіндегі көше жолдарында болған. Тағы бір дерек, жолда жан тапсырғандар­дың тоқсан пайызы ер адамдар. Еркек кіндіктілердің бейбіт күнде қынадай қырылып жатқаны ойланарлық жағ­дай. Жолда абай болайық. «Жылдам­дықты асыру – ажалыңа асығу» екенін ұмытпайық.

Мереке Ержанұлы.

Поделиться ссылкой: