Қыл қаламның құдіретін түсінген жан

648 Views

Аудан орталығынан шалғай жат­қан Жарлысу ауылында есімі елімізге бел­гілі көптеген танымал тұлғалар дүние­ге келген. Атап айтар болсақ, былтыр ға­на Қазақстанның Тұңғыш Президенті-Елбасы Нұрсұлтан Назарбаевтың қо­лынан «Қазақстанның Еңбек Ері» ата­ғын алып, жазиралы Жамбыл өңірінің мақтанышына айналып отырған белгі­лі меценат Сайрамбай Дөненбаев, 2000 жылдары теледидардан көрсетілген «Ұят болмасын» ойын-сауық бағдар­ла­масының жарық жұлдызы, бүгінде Алматы қаласындағы Мұхтар Әуезов атындағы Қазақ мемлекеттік акаде­мия­лық драма театрының беделді ак­тері Жалғас Толғанбай және айтыс өнерінде тыңнан түрен салып, өзінің даралығымен көзге түсіп жүрген Айтбек Тұрсынбай сынды білікті де та­лант­ты азаматтар осы ауылдың төл пер­­зент­тері болып есептеледі. Аты атал­­­ған азаматтардың қатарына жанға жай­­лы Жарлы­суда білім алған ақын Жанат Тілеуқұлқызын да қоссақ болады.
Жанат Тілеуқұлқызы Құлан ауы­лында дүниеге келгенімен, оның бал­дай тәтті балалық шағы Жарлысуда өт­кен. Сонда алғаш әліпби танып, ұлағат­ты ұстаз Бәди апайдың тәлімін ал­ған. Поэзия әлеміне кештеу келсе де:
— Мән бермей келген ойларым,
Сыздата бердің санамды.
Сезімім, шіркін қоймадың,
Алдырдың қолға қаламды, -деп жырлаған ақын Жанаттың «Жарлы­су­ға сапар», «Отанды сүю», Әйел-ана» секілді өлеңдері зиялы қауым тара­пы­нан жоғары бағаланып, жамбылдық жұртшылықтың ыстық ықыласына ие болып келеді.
Жуырда Жарлысу ауылын­дағы Айтқұл Шынасілов атындағы ша­ғын орталықты орта мектеп­тің акт за­лын­да «Қыл қалам­ның құдіретін түсінген» де­ген тақырыпта ақын Жанат Тілеуқұлқызы­мен кездесу кеші өтті. Елбасының «Болашаққа бағдар: рухани жаңғыру» атты мақаласы аясында өрбіген аталмыш кешті Жарлысу ауыл­дық кітапханасының кітапханашы­сы Алтынкүл Рысбекова ұйымдастырды.
«Түсінгің келсе жырды сен,
Сапар шек жырдың еліне.
Түсінгің келсе ақынды,
Сапар шек ақын еліне» деп неміс ақыны Гете жырлағандай, мазмұнды кеш барысында жарлысулық жұртшы­лық Жанат ақынның жалынды жыр­ларына қанықты. Бенефис-шоу фор­матында өрілген кездесу кеші тосын сыйларға да толы болды. Жанат Тілеуқұлқызының 50 жыл көріспеген сыныптас құрбысы Фазихан әпкеміз ортаға шыққанда ақын қуанышын­да шек болған жоқ. 1 сағатқа созыл­ған эстетикалық-шығармашылық кеш­те Сәния Тұрсынбай «Өлең — өткелім», Ақбота Жұмабек «Өлеңім», Асылай Қалау «Қазақ», Гүлзира Шәбден «Отанды сүю», Меруерт Тұрсынбай «Мектебім», Мейіржан Алахан «Жастық дәурен», Мөлдір Торғауытова «Әйел-ана», Ақбота Есіркеп «Жарлысуға сапар» сын­ды ақын Жанаттың өлеңдерін жат­қа оқып, залға жиналған көрермен­дер­дің қошеметіне бөленді. Кеш соңында аудандық орталықтандырылған кітап­ханалар жүйесінің директоры Нұрсұлу Топатаева мен Айтқұл Шынасілов атын­дағы шағын орталықты орта мек­тептің директоры Дархан Бұламбаев сөз сөйлеп, ақын шығармашылығына қуат­ты өріс тіледі. Кеш соңында Жанат Тілеуқұлқызы сиясы кеппеген жыр-жолдарын оқып, ұстазы Бәди апай­мен осы кездесуді ұйымдастырған Алтынкүл Рысбекованың иығына қа­зақы оюмен әдіптелген камзол жапты.

Марат Диханбай.

 

Поделиться ссылкой: