Абай дүниетанымы дәріптелді
820 Views
Абай Құнанбайұлының 175 жылдығына орай Максим Горький атындағы орта мектептің кітапханашылары Нәзира Үсейінова, Ирина Филинкова және аталмыш білім ошағының қазақ тілі мен әдебиеті пәнінің мұғалімдері Шынар Халбаева, Сандуғаш Сұлтанқұлова «Абай қара сөздері – өмір пәлсапасы» деген тақырыпта өзгеше форматта іс-шара ұйымдастырды. Іс-шара шымылдығын мектеп директоры Гүлсім Найзабекова сөз сөйлеп, ашып берді. Ол өз сөзінде:
– Дана халқымыз «Ұлы адамның үнін есті, үйіне барма» деген. Біз қазақтың ұлы ақыны Абай Құнанбайұлының үнін оның тағылымы терең шығармаларынан оқыдық, әлі де оқып келеміз. Абай хакімнің «Айлакерлік алысқа апармайды», «Қолдағыңды қорғап бақ», «Ұйықтап жатқан жүректі ән оятар» деген сөздерін мен әркез айтып жүремін. Ел Президенті Қасым-Жомарт Тоқаев «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында Абай Құнанбайұлының 175 жылдық мерейтойын ұлттық деңгейде атап өту жөнінде сөз қозғап, тапсырма жүктеген болатын. Аудандық білім бөлімі тарапынан жоспарлы кесте әзірленіп, соның аясында бүгін біз ауқымды іс-шара ұйымдастырып отырмыз. Абай – ойшыл. Абай – сөз зергері. Сондықтан Абайды оқыңыздар. Себебі, хакімнің әрбір шығармасынан ұлттық рух алуға болады,-деді.
Іс-шара барысында Әзиза Жексен, Ләйла Махмуд, Темірлан Аман, Нұрдәулет Қоңыр, Алмат Мұсахан, Қуаныш Нұрмахан, Сәния Әшімәлі, Мерей Ахан, Меруерт Иман, Балғын Таңатар, Аяжан Тоғаева, Зәуреш Орынбасар, Нүрсила Жаңабаева, Әйгерім Ахметбекова, Жансая Жакенова, Гүлнұр Тұрсынбек, Әсем Жахабай есімді мектеп оқушылары Абай Құнанбайұлының қара сөздерін оқу арқылы өздеріне өмірлік сабақ алатындықтарын айтып қана қойған жоқ, сонымен бірге, хакімнің өлеңдерін жатқа оқып берді.
Шара соңында қазақ тілі мен әдебиеті пәнінің мұғалімі Шынар Халбаеваға сөз тізгіні берілді. Әрқашан тынымсыз ізденісте жүретін ұлағатты ұстаз Абай дүниетанымын бір оқығаннан түсіне қою екіталай екенін сөз етіп, қазақтың данышпан ақынының шығармашылығын дәріптеу мақсатында ұйымдастырылған мазмұнды іс-шараға атсалысқан Мәди Абдалиев, Тоқтар Әшірәлі, Балжан Отарбаева есімді ұжымдас әріптестеріне алғысын білдірді. Содан соң, осы шараға белсене қатысқаны үшін есімдері жоғарыда аталған мектеп оқушыларын алғыс хатпен марапаттады.