Іскер басшы берекелі бастамаларға себепші

459 Views

Сейсенбі күні аудан әкімі Ерболат Са­дырқұловтың 2019 жылы атқарылған ау­қымды жұмыстар төңірегіндегі ке­зекті есеп беру жиналысы орталықтан шалғай қашықтықта жатқан Қайыңды ауыл­дық округінде жалғасын тапты. Ауыл­дық клуб ғимаратында өткен әкім есебіне қайыңдылықтар әдеттегідей белсенділік танытып, көптеп жиналды. Жиында ең алдымен ауылдық округтің әкімі Азамат Асанбай сөз алып, до­ңыз жылында атқарылған баянды тір­ліктердің ретін жіпке тізді. Одан кейін мін­беге көтерілген аудан басшысы Ерболат Салқынбекұлы жергілікті жұртшылыққа өткен жылғы оң шешімін тапқан игі істерді баяндап берді.
Осыдан 4-5 жыл бұрын ау­дан әкімінің жыл­дық есеп беру жи­налыстарында қайың­дылықтар көгілдір отынның жайын айтып, өздерінің сұрақтарын жау­дырушы еді. Қазір Қайыңдыға көгіл­дір отын тартылған. Электр жа­ры­ғынан бұл ауылда проблема жоқ деу­ге болады. Ауыз су мәселесі де түйт­­­кілді сұрақтардың бірі болатын. Алай­да, бұл да өз шешімін тауып, қайыңдылықтар бүгінгі күні таза ауыз суды тұтынып отыр. Газ бен ауыз су мәселесі толықтай шешілгендіктен, есепті жиында жергілікті тұрғындардың сауалдары мейлінше аздау болатын шығар деп топшылағанбыз. Алайда, округ тұрғындарының қос әкімге қояр сұрақтары таусылмады. Жиынға қаты­сушылардың көпшілігі таудан келетін судың аздығы шаруаға өз кедер­гісін тигізіп отырғандығын айтады. Былтырғы есепті жиында Қайыңдыда балалар бақшасының жоқтығын айтып қынжылған ауыл ақсақалы Әбділда Нұржанов та бұл жолы тау аңғарынан келетін ағын судың жайын сөз етіп, көп­шіліктің сөзін растады. Округ тұр­ғын­дары тарапынан қойылған са­уал­дар­ды ыждахаттылықпен тыңдаған Ерболат Салқынбекұлы көктем айын­да таудағы бұлақтардың көзін ашу жұ­­мыс­тары тағы да жүргізілетінін айт­ты. Айтпақшы, соңғы кездері ауыл тұрғындарын алаңдатқан тағы бір мә­селе бар. Қайыңды ауылдық дәрі­герлік ам­булаториясында жоғары білім­ді дәрігерлер көп тұрақтамайтын. Аудан бас­шысы Ерболат Садыр­құловтың тия­нақты тірлігінің арқасында бұл мәселе оңтайлы шешіліп, қазір ауылдық ем­ханада жоғары білімді маман қыз­мет істеп жүр. Аудан әкімінің бұл іскер­лігіне қайыңдылықтар дән риза болысты.
Шыны керек, көп мәселенің түйі­ні тарқатылған ауылдық округтің бірегейі — Тереңөзек. Газ, электр жа­рығы, ауыз су мәселесі барлығы ра­сы­мен де Тереңөзекте шешілген. Ауыл­дық клуб замануи үлгіге сай күр­де­лі жөндеуден өткен. Рас, балалар бақшасының жоқтығы ауылдағы бас­ты проблемалардың бірі еді. 2018 жы­лы ол мәселе де өз шешімін тапты. Яғ­ни, ауылда мемлекеттік-әріптестік шең­бе­рін­де Талғат Жүнісқадыровтың демеу­ші­лігімен «Балауса» балалар бақшасы ашылып, қазір бұл мекемеде ауыл бүл­діршіндері тәрбиелену үстінде. Сон­дықтан болар, округ әкімі Мұхтар Мұсаев пен аудан әкімі Ерболат Садырқұлов­тың өткен жылдың он екі айын­да атқарылған жүйелі жұмыс­тар жөніндегі есепті жиналысында терең­өзектіктер қос әкімді көп сұрақтың астына алған жоқ. Тек ауылдық ок­руг­ке қарасты Шолаққайыңды елді ме­кені­нің тұрғыны, зейнеткер ұстаз Бейшеналы Қалмырзаев ақсақал кө­тер­ген мына бір мәселе жиындағы өзек­ті сұрақтардың бірі болды біздіңше. «Құрметті Ерболат Салқынбекұлы, бүгінгі сіздің ауылдық округтің әкі­мі Мұхтар Мұсаевпен бірлесіп өткіз­ген жылдық есебіңізді өз басым қана­ғаттанарлық деп бағалаймын. Ауыз су­дың жайы сіздің баяндамаңызда жан-жақты айтылды. Өте қуанышты­­­мыз. Сондықтан ол жағына тоқталмай-ақ қояйын. Ал енді өзім ұзақ жылдар бойы ұстаз болғандықтан бала тағдырына қат­ты алаңдаушылық білдіремін. Біз­дің Шолаққайыңды елдімекенінен ок­руг­тің орталығы Тереңөзек ауы­лын­да­ғы «Балауса» балалар бақшасына бүлдіршіндер тасымалданады. 8-9 бүл­діршінді бір жеңіл көлік маши­на­­сына сыйғызады. Бұл енді сұмдық қой. Осыған назар аударып, ықпал жа­­сауы­ңызды сұранамын» деді зей­нет­кер ұстаз. Ақсақал сауалына жан-жақ­ты мысалдар арқылы жауап берген аудан басшысы бұл мәселені бақы­лау­ға алатынын айтып, хаттамаға енгізді.

Ал өткен жылы есептік жиналыс­та тұрғындардың базынасынан гөрі тілегін көп естіген Өрнек ауылдық ок­ругінің әкімі Бауыржан Ақүрпеков бұл жолы былтырғыдай ықыласқа ке­нел­ді дей алмаймыз. Ал аудан әкімі Ерболат Садырқұловтың іскерлігін жо­ға­­ры деңгейде бағалайтындықта­рын жарыссөз барысында ұқтырып жатты өрнектіктер. Әрине 2019 жы­лы ауылдық округте және аудан аума­ғын­да атқарылған бірқатар оңды тір­лік­тердің жай-жапсары қос әкімнің баян­да­маларында жан-жақты айтылды. Оны тыңдадық. Ең бастысы, биыл Өрнек ауылдық округіне қарасты Жарлысу және Әбжапар елді мекендеріне жаңа ауыз су құбыры тартылатын болады. Бұл өте қуанышты жаңалық. Жиналыс­та округке қарасты Сәлімбай ауылы­ның тұрғындары да таза ауыз су жүйе­сі тартылса деген ұсыныстарын білдір­ді. Өрнекке мәдениет үйін салу мәселесі де ұзақ жылдан бері көтеріліп келе­ді. Аталмыш мәселелердің барлы­ғын өз бақылауында ұстап отырғанын ес­керт­кен аудан әкімі алдағы уақытта рет-ретімен бұл проблемалардың да түйіні шешілетінін нақты мысалдар­­мен тарқатып айтып берді.

Марат Диханбай.

Поделиться ссылкой: