Абай есімі ұлықталды

464 Views

Қазақта Абайдан асқан дана бар ма? Өлеңдері мен қара сөздері, поэма­лары мен әрбір айтқан нақыл сөздері, аудармалары мен әндері әр жүректі нұрға бөлеп, өмірлік азық болар дүние­лері аз емес. Басқасын былай қойғанда, оның жүріп өткен өмір жолының өзі әрбір қазаққа үлгі, жас ұрпаққа өнеге. Абайды кім жырламады, Абайды кім үлгі етпеді десеңізші! Әрбір ақын, жазушы, әдебиет сүйер қауым, тіпті, әрбір қазақ Абайдың өлеңімен сусындап өсті десек, қателеспейміз. Ұлы ақынның қара сөздерін көңіліне ұялатқан жан өмір жолында адаспай ғұмыр кешіп, мақсатын айқын таңдай біледі деуімізге де толықтай негіз бар. Себебі, Абай жай ғана ақын емес, өмірдің қыр-сырын терең суреттеп, түзу жолды айқын көр­сете білген һәкім, философ, ғалым әрі дара да, дана да бола білген жан. Ендеше, әр қазақ Абаймен мақтана да алады, Абайды ұлықтаудан жалықпайды да!
Биыл һәкім Абайдың туғанына 175 жыл толып отыр. Атаулы оқиғаға орай жыл басынан бері еліміздің түкпір-түкпірінде әртүрлі іс-шаралар ұйым­дастырылып, бірнеше байқаулар жария­ланды. Тіпті, ауданымыздың өзінде көптеген іс-шаралар өткізілді. Соның бірі Көгершін ауылдық округіндегі Ақтоған шағын орталықты орта мекте­бінде ұйымдастырылды. Шараға бү­кіл мектеп ұжымы бір кісідей атса­лысты. Қазақ тілі мен әдебиеті пәні мұғалім­дерінің ұйымдастыруымен өткен әдеби-сазды кеште қазақ данасының өлеңдері мен поэмаларынан үзінділер оқылды. Онымен қоса, Абайды үлгі етіп, оған жыр арнаған мектеп оқушылары өз шығармашылықтарын паш етіп, әдеби кештің көркін ашты. Әсіресе, «Айттым сәлем, Қаламқас», «Көзімнің қарасы», «Желсіз түнде жарық Ай» секілді Абай әндері шырқалғанда, барша көрермен ұйып тыңдап, іштей тебіренгендей күй кешті. Осылайша, Ақтоған ша­ғын орталықты орта мектебінде де ақын­ның шығармашылығы тағы бір мәр­те дәріптеліп, есімі тағы бір мәрте ұлықталды.

С. Қарасаева,
Ақтоған шағын орталықты орта мектебінің қазақ тілі және әдебиеті пәні мұғалімі.

Поделиться ссылкой: