Көшбасшы партия әркез халықтың қолдаушысы
526 Views
«Нұр Отан» партиясы еліміздегі көшбасшы саяси ұйымның бірегейі екені белгілі. Партияның халық кәдесіне жарайтын сан түрлі бағдарламалары бар. Көптеген игі істің бастамашысы болған «Нұр Отанды» отандастарымыздың басым көпшілігінің қолдайтындықтары сондықтан болса керек.
Өткен жұмада «Нұр Отан» партиясы Жамбыл облыстық филиалы төрағасының бірінші орынбасары Нарбаев Балабек Жанбекұлы мен Қазақстан Фермерлер Одағы қауымдастығының төрағасы Жигули Дайрабаев ауданымызға арнайы іссапармен келіп, аудандық мәслихат депутаттарымен кездесті. Алдымен партия аудандық филиалы төрағасының бірінші орынбасары Қанатбек Арыстанбеков сөз сөйлеп, партия тарапынан аудан аумағында атқарылып жатқан оңды істерді атап өтті. Одан кейін «Нұр Отан» партиясы Жамбыл облыстық филиалы төрағасының бірінші орынбасары Балабек Жанбекұлы өз ойын ортаға салды.
– «Нұр Отан» партиясы әркез халықтың қамқоршысы әрі қолдаушысы. Өздеріңізге белгілі, Қазақстан Республикасының Тұңғыш Президенті-Елбасы, партия төрағасы Нұрсұлтан Әбішұлы Назарбаевтың бастамасымен елімізде «Біз біргеміз» атты қор құрылған болатын. Республикадағы беделді кәсіпкерлердің атсалысуымен аталмыш қорға қыруар қаржы жиналды. Есесіне, жиналған қаражаттың барлығы ел аумағындағы көп балалы және тұрмыс жағдайына байланысты аз қамтылған отбасыларға көмек көрсетуге жұмсалады. Қазақтың заңғар жазушысы Әбіш Кекілбаев «Аузымызға алалық түсірмесек, ісімізге шалалық түсірмейміз» деген. Осындай қиын сәтте біз әрқашан бір-бірімізге қолдау көрсетуіміз керек. Қазақ талай қиындықты еңсерген халық. Берекелі бірлігіміз мығым болса, бұл індеттен де аман шығатынымызға кәміл сенемін, -деді партия облыстық филиалы төрағасының бірінші орынбасары.
Бұдан кейін Қазақстан Фермерлер Одағы қауымдастығының төрағасы Жигули Дайрабаев та сөз сөйлеп, елдің бірлігі бекем болғанда ғана мемлекетіміздің мерейі үстем боларын айтты. Кездесу соңында аудандық ардагерлер Кеңесінің төрағасы Қожайхан Бижанов сөз сөйлеп, келген меймандарға дәйекті әрі тұшымды мағлұмат айтқаны үшін алғысын білдірді.
Содан соң Балабек Нарбаев пен Жигули Дайрабаев майдан даласында етігімен су кешіп, фашистік Германияның әскерінен отанын азат еткен Ұлы Отан соғысының ардагері Жахан Мырзахметов ақсақалдың шаңырағына бас сұқты. Төтенше жағдай кезінде азық түлік тауарын әкеліп, хал сұрай келген інілеріне майдангер ақсақал ризашылығын білдіріп, ағалық ақ батасын берді. «Нұр Отан» партиясы Жамбыл облыстық филиалы төрағасының бірінші орынбасары Балабек Жанбекұлы мен Қазақстан Фермерлер Одағы қауымдастығының төрағасы Жигули Дайрабаев Құлан ауылының тұрғыны, көп балалы ана Г.Мырзабекованың да шаңырағына бас сұғып, азық-түлік өнімдерін табыс етті. Өз кезегінде 32 жастағы көп балалы ана осындай қиын сәтте халыққа қолдау көрсеткен «Нұр Отан» партиясына алғысын білдірді.
Марат Жолдасбекұлы.