Менің атам майдангер

611 Views

Жеңістің 75 жылдығы қарсаңында сұрапыл соғысқа қатысқан батыр бабалардың есімдерін қайта жаңғыр­тып, ұлықтауды өз басым жөн са­най­мын. Енді соғыс жылдарында қаһар­мандықтың қайталанбас үлгісін көр­сеткен майдангер атам жайында кеңі­нен сөз қозғасам деймін.
Менің атамның есімі – Мәлік Егем­бердіұлы. Ол 1922 жылы 3 қаң­тарда Жамбыл облысы, Луговой ауданы, Талдыөзен ауылында дүниеге кел­ген. Жастайынан қиындықты көріп, ашаршылық жылдарында Қырғыз­станның Кетпентөбедегі балалар үйінде тәрбиеленеді. Онда 7 жылдық бі­лім алады. Содан соң Бішкек қала­сындағы техникумға оқуға түседі. Бірақ, сол білім ордасында оқып жүрген ке­зін­де соғыс басталып, әскер қатарына алынады.
Соғыс жылдарында атам Сталин­град тү­бінде болған қанды қырғынға қаты­сады. Майдан шебінде болып, жауына минаметтен оқ жаудырады. Осын­дай арпалыстардың бірінде мина жа­рық­шағы аяғына тиіп, жарақаттанып қа­лады. Осыдан соң ол туған елге ора­лады.
Атам соғыстан қайтқан жылдары ауыл мектептерінде ұстаз жетіспейтін, сондықтан болар, ол мектепке мұға­лім болып орналасады. Абай атын­дағы мемлекеттік педагогикалық инсти­тутының физика-математика факультетін сырттай оқып, бітіреді. Ол Ақыртөбе, Калинин орта мектеп­терінде оқу ісінің меңгерушісі, Мұхтар Әуезов, Карл Маркс (қазір Болтай батыр атымен аталады) атындағы орта мектептерде директор қызметін ат­қарды. Сонымен қатар, физика-математика пәндерінен дәріс берді. Бір сөзбен айтқанда, өз ісінің білікті маманы болды. Сондықтан болар «Қазақ ССР білім беру ісінің үздігі» деген жоғары атаққа ие болды. Одан бөлек оның омырауында майданда көрсеткен ерлігі үшін алған бірнеше медальдары жарқырап тұратын. Бұл оны ерекше айбарландырып тұратын. Оның бейнесі мені де жігерлендіре түсетін. Мен осындай майдангер атам болғанын мақтан етемін.
Атам өзіне де, өзгеге де қатал талап қоя білетін және оның орындалуын үнемі қадағалап отыратын еді. Содан болар Болтай батыр атындағы орта мектеп аудан, тіпті облыс көлемінде алдыңғы қатарда болатын. Зейнетке шыққанға дейін Құмарық ауылындағы Болтай батыр атындағы орта мектепте қызмет етті. Өзінің саналы ғұмырында өскелең ұрпақты елін, жерін қадірлеуге үйретті.
78 жасында өмірден өткен атамның өмір жолы кейінгі ұрпақтары үшін үлгі-өнеге. Атамыздың әрбір айтқан сөзі санамызда әлі де жаңғырып тұр.Ата, біз өзіңізбен әрқашан мақтанамыз!

Айдын Иебаев,
Болтай батыр атындағы шағын орталықты орта мектеп директорының бағдарлы ісі жөніндегі орынбасары.

Поделиться ссылкой: