“Жемқорлық жарға жығады” іссапар түйіні осындай сөзбен қорытындыланды

439 Views

Өткен аптада ҚР Сыбайлас жем­қорлыққа қарсы іс-қимыл агент­тігінің Жамбыл облысы бойынша департаменті басшысының бірінші орынбасары Төле­баев Равиль Қуанышбайұлы арнайы жұмыс сапарымен ауданымызға келді. Равиль Қуанышбайұлы ең бірінші кезек­те Құмарық ауылдық округіндегі пилот­тық жоба бойынша құрылған «Құ­марық-Тау» ауылшаруашылығы коопе­ративінің нәтижелі жұмысымен таныс­ты. Одан кейін, Равиль Төлебаев пан­демияның екінші толқынына мед­пунктер қаншалықты дайын екенін білу мақсатында Луговой ауылдық дәрігерлік амбулаториясының ғима­ратына келді. «Емханада дәрі-дәрмектен мүлде таршылық жоқ десек болады. Біз жағдайды басты назарда ұстап отыр­мыз» деп өз ойын білдірді осы арада аудандық орталық аурухананың бас дәрігері Шындос Мырзалиев. Равиль Төлебаев сонымен бірге Смат Есімов көшесінің бойына төселген 1 ша­қырымдық сая жол құрылысының жұмысын жаяу аралап көріп, оның сапа­сына жіті көңіл аударды. Луговой ауылының әкімі Мұрат Свановтың айтуынша, «Жұмыспен қамтудың жол картасы» бағдарламасы бойынша жүр­гізілген сая жол құрылысына 11 миллион теңге қаражат бөлінген екен. Құры­лыс жұмысының сапалы істелгені расымен де көзге көрініп тұр. Оны Равиль Қуанышбайұлымен бірге келген ҚР Сыбайлас жемқорлыққа қарсы іс-қимыл агенттігінің Жамбыл облысы бойын­ша департаменті жанынан құрыл­ған ақпараттық-ағарту штабының же­тек­шісі Қасымхан Төлендиев те өз сө­зінде атап өтті.
ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаменті басшысының бірінші орынбасары келесі кезекте Нұргүл Төленқызы басшылық жасайтын аудандағы ордалы білім ошағының бірегейі саналатын Әлихан Бөкейханов атындағы орта мектеп ғимаратына бас сұқты. Мектеп басшысы талай жылдан бері айтылып келген мәселе биыл оңды шешіліп, «Жұмыспен қамтудың жол қартасы» бағдарламасы бойынша аталмыш білім мекемесіне күрделі жөндеу жұмысы жүргізілге­нін айтты. Бұл мектепке құрылыс жұмысын жүргізген мердігер компания өкілдері жауапкершілікті ұғынып, жұмысты сапалы жүргізгені көзге көрініп тұр. Содан соң, Равиль Төлебаев мектеп ішін аралап көріп, өзінің оң бағасын берді.
Бұдан соң, ҚР Сыбайлас жем­қор­лыққа қарсы іс-қимыл агенттігінің Жамбыл облысы бойынша департамен­ті басшысының бірінші орынбасары Равиль Қуанышбайұлы Құлан ауы­лын­дағы су іркуіш имаратын қайта жаңғырту, сондай-ақ, Шөңгер ауылына баратын жолдың орташа жөндеу, Құлан агротехникалық жоғары колледжі­нің 1-ғимараты мен асханасына жүргізіліп жатқан күрделі жөндеу жұмыстарымен және аудандық орталық аурухананың індеттің екінші толқынына дайындық барысымен танысты.
Түс мезгілінен соң облыс әкімінің орынбасары Талғат Мамаев пен ҚР Сыбайлас жемқорлыққа қарсы іс-қи­мыл агенттігі Жамбыл облысы бойын­ша департаментінің басшысы Әділхан Әшірбаев арнайы келіп, «Сервистік әкімдік» жұмысымен танысты. Талғат Шариұлы мен Әділхан Қасымханұлына «Құлан – адалдық алаңы» жобалық офисінің жетекшісі Дария Нарматова «Сервистік әкімдіктің» негізгі жұмы­сының мақсаты жөнінде айта келіп, 2 мекеме мен 5 бөлім тарапынан аудан халқына көрсетілетін мемлекеттік қыз­меттер туралы ақпараттарды жіпке ті­зіп баяндап берді.
Киелі Құлан жеріне жасалған жұмыс сапардың соңы актив жиынымен қорытындыланды. Аудан әкімдігінің мәжіліс залында өткен актив жиынына облыс әкімінің орынбасары Талғат Мамаев пен ҚР Сыбайлас жемқор­лық­қа қарсы іс-қимыл агенттігі Жамбыл облысы бойынша департаментінің басшысы Әділхан Әшірбаев, ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаменті басшысының бірінші орынбасары Равиль Төлебаев, «Жамбыл- адалдық алаңы» жобалық кеңсесінің жетекшісі Назима Жуван­дикова, сонымен қатар аудан әкімінің орынбасарлары, бөлім басшылары мен ауыл әкімдері қатысты. Жиын барысында аудан әкімі Ерболат Садырқұлов қысқаша баяндама жасап, ауданда атқарылып жатқан ілкімді істердің ретін баяндап берді. Одан кейін ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаменті жанынан құ­рылған ақпараттық-ағарту штабының жетекшісі Қасымхан Төлендиев мінбе­ге көтеріліп, ауданда көптеген игі тірлік­тер жасалып жатқанын тілге тиек етті. Ақпараттық-ағарту топтың жетекшісі осы тірліктің барлығында сыбайлас жемқорлықты болдырмау керектігін, себебі, жемқорлық адам баласын өрге емес, жарға жығатынын сөз етті. Одан кейін өз пікірін ортаға салған облыс әкімінің орынбасары Талғат Шариұлы мен ҚР Сыбайлас жемқорлыққа қарсы іс-қимыл агенттігі Жамбыл облысы бойынша департаментінің басшысы Әділхан Қасымханұлы ел аумағы мен өңірде болып жатқан сыбайлас жем­қорлыққа қарсы іс-шаралардың реті туралы кеңінен сөз қаузады. Жиын ба­ры­сында жаһанды дендеген сыбай­­лас жем­қорлықтың алдын алу мәдение­тін қалыптастыру туралы жан-жақты тү­сіндірілді. Аудан әкімі Ерболат Садырқұлов жиынды қорытынды­лап, киелі Құлан жеріне арнайы іссапар­мен келіп, мәні бар мазмұнды жиын өткізгені үшін келген қонақтарға өз тарапынан алғыс білдірді.

Марат Диханбай.

Поделиться ссылкой: