Аудандық кәсіпкерлер өз тауарларын ұсынды
478 Views
Осы айдың басында облыс кәсіпкерлері Нұр-Сұлтан қаласына арнайы барып, елордалықтарға өз тауарларын ұсынғаны әлі есімізде. Енді міне, араға аздаған уақытты салып, аймақ кәсіпкерлері алматылықтарға арналған жәрмеңкеде өздері өндірген тауарларды саудалап көрді. Айта кету керек, аталмыш жәрмеңкеде сөрелерге қойылған өнімдер нарық бағасынан 15-20% төмен бағада сатылды.
Әлемде індеттің өршуінен көптеген сала дағдарысқа ұшырағаны айтпаса да белгілі. Дегенмен, биыл карантин шектеулеріне қарамастан ауылшаруашылығы саласына еш кедергі келтірілген жоқ. Бұл билік басшыларының дер кезінде қабылдаған оң шешімдерінің нәтижесі деп білеміз. Соның арқасында шаруалар мол өнімге кенеліп, кәсібінен өз нәсібін таба білді.
Мол өнім болғаны жақсы әрине. Дегенмен, оны өткеру де оңай шаруа емес. Өнімдерді сақтайтын қоймалардың жоқтығы да маңызды мәселеге айналып отыр бүгінде. Енді қайтпек керек? Осы бір туындаған сауалды шешу мақсатында аймақ басшылары ірі мегаполистерге барып, жәрмеңке ұйымдастыруда. Аталмыш іс-шараларға аймаққа қарасты барлық аудандардың кәсіпкерлері атсалысуда. Дәл мұндай бағыттағы жәрмеңкелер қос тарапқа да тиімді. Неге? Өйткені, бір жағынан кәсіпкерлер өз тауарларын ысырап етпей, өткере алатын болса, екіншіден, табысынан айырылған азаматтар жәрмеңкеде тиімді бағамен тауар алуға таптырмас мүмкіндік.
Алматы қаласында ұйымдастырылған жәрмеңкеге аудандық кәсіпкерлер де қатысты. Олар жәрмеңкеге 5 тонна картоп пен 1,5 тонна көлемінде әр түрлі көкөністер мен бақша дақылдарын ұсынып, сатылымға қойды. Сондай-ақ, аудандық кәсіпкерлер 1 тонна сүт және 3 тонна ұн өнімдерін, 500 кг бал, 1 тонна сарымсақ апарып, тиімді бағада саудалады. Жәрмеңке барысында кәсіпкерлер алматылықтарға ет өнімдерін де ұсынды. Атап айтар болсақ, олар 3 тонна сиырдың, 1,5 тонна жылқының, 1 тонна қойдың етін шығарып, әсем қала тұрғындарының сұранысын барынша қанағаттандырды.
Жәнібек БАЗЫЛБЕКОВ.