Ауданда алғаш рет мурал салынды

Ел Тәуелсіздігінің 30 жылдығына орай Т.Рысқұлов ауданында белгілі қоғам қай­рат­кері, ұлт зиялысы Тұрар Рысқұловтың муралы пай­да болды.
Бұл арт-жоба ауданның орталық көшесі Жібек жолы мен Ә.Тілепов көше­сінің қиылысында орналасқан «Қазпошта» ғимаратының қасбе­тінде салынды.
Муралды салу үшін 2 жұмыс күні жұмсалды.
Айта кетейік, арт-нысан ҚР Сыбайлас жемқорлыққа қарсы іс-қимыл агент­тігінің Жамбыл облысы бойын­ша департаментінің бастамасымен, Құлан ауылдық округі әкімшілігінің қолдауымен жүзеге асырылып отыр.
Аудан тұрғындары ғимарат қабырғасына сән беріп тұрған стрит-арт суретін қолдап, оны аудан мақтанышына айнала­тынына сенімді. Мәселен, аудан тұрғыны Азат Алиханов аталмыш жобаның идея автор­ларына ризашылығы зор екенін айтады.
«Бұл баянды бастама халқына пана болған, өз ұлты үшін бар күш-жігерін жұмсаған ұлы тұлға Тұрар Рысқұловқа деген құрметті одан әрі арттырады деп үміттенеміз. Сондай-ақ, нар тұлғаның есімін еншілеген біздің ауданымыз үшін үлкен мақтаныш деп есептеймін», – деп өз ойын ортаға салды Құлан ауылының тұрғыны.
Расымен де аталмыш бас­тама қолға алынғандардың арасындағы ең тиімдісі. Алдағы уақытта да өзге де ғимараттардың қасбетіне дәл осындай тау тұлғалардың суреттері салынады деген үміттеміз.

«Құлан таңы» ақпарат.

Поделиться ссылкой: