Атаулы әлеуметтік көмек – шын мұқтаждарға
519 Views
Мемлекеттік атаулы әлеуметтік көмек тағайындау және төлеу, кепілдік берілген әлеуметтік топтаманы ұсыну қағидаларының негізінде атаулы әлеуметтік көмек алуға үміткер отбасы атаулы әлеуметтік көмек туралы ақпарат алу үшін тұрғылықты жері бойынша «Халықты жұмыспен қамту» орталығына, ал орталық болмаған жағдайда ауыл, ауылдық округ әкіміне жүгінеді.
Сонымен қатар, Әлеуметтік көмек саясатын дамыту департаментінің 2021 жылғы 19 наурыздағы хаттамасына сәйкес, 2021 жылғы 1 сәуірден бастап АӘК тағайындауға өтініштерді қабылдау «Электронды үкімет» порталы (egov.kz) арқылы жүзеге асырылады.
Отбасының әрбір мүшесіне төленетін атаулы әлеуметтік көмек мөлшері, отбасының жан басына шаққандағы орташа табысы мен белгіленген кедейлік шегі арасындағы айырма түрінде есептелінеді. Жан басына шаққандағы орташа табыс АӘК тағайындауға өтініш жасаған тоқсанның алдындағы тоқсанда алынған жиынтық табысты отбасы мүшелерінің санына және үш айға бөлу арқылы есептеп шығарылады.
АӘК тағайындауда отбасының еңбекке жарамды мүшесі жұмысқа орналасудан бас тартса, АӘК тағайындалмайды. Еңбекке қабілетті азамат жұмысқа орналасудан бас тартқан жағдайда бүкіл отбасы мүшелеріне атаулы әлеуметтік көмек төлемі тоқтатылады. Атаулы әлеуметтік көмек алу үшін ең басты шарт – отбасының жұмыс істеуге қабілетті мүшесі жұмыс істеуі тиіс. Аз қамтылған отбасылардың жұмыссыз азаматтарға бағытталған жұмыспен қамту бағдарламасы аясында АӘК алушыларға бос жұмыс орындары, уақытша жұмыс орындары, жеңілдетілген шағын несие, қайтарымсыз грант және қысқа мерзімді кәсіби оқыту ұсынылады.
Жалпы Т.Рысқұлов ауданы бойынша 2022 жылдың 1 сәуіріне «Электрондық үкімет» (egov.kz) порталы арқылы жан басына шаққандағы табыстары күнкөріс деңгейінің кедейшілік шегіне жетпейтін 517 отбасыға атаулы әлеуметтік көмек тағайындалған. Атаулы әлеуметтік көмек алушылардың ішінен шартсыз ақшалай көмек алушылар 73 отбасы (332 адам), шартты ақшалай көмек алушы отбасылар 444 отбасыға (2663 адам) жеткен.
Алайда шын мұқтаждарға берілетін көмекті мұқтаж емес отбасылар да алуды көздейді. І тоқсан бойынша учаскелік комиссияның шешімімен 25 отбасы әлеуметтік көмекті заңсыз алғаны анықталды. Осыған байланысты, аудан әкімдігі жұмыспен қамту және әлеуметтік бағдарламалар бөлімі құзырлы органдармен бірлесіп, заңбұзушылықтардың алдын-алу бойынша әрбір ауылдық округте АӘК алушыларды қайта тексеру жұмыстары жүргізілу жоспарлануда.
Марғұлан Мұсаханов,
«Халықты жұмыспен қамту орталығы» КММ-нің сектор меңгерушісі.