Луговойлық жастар кәсіпкерлікке бет бұрып келеді

287 Views

Осыдан бірнеше ай бұрын редакция телефоны шырылдай берді. Тұтқаны көтерсек, арғы жағында Луговой ауылының әкімі Мұратбек Сванов сөйлеп тұр…

Жәнібек, ассалаумағалейкум! Қалдарың қалай? Сендерге бір өтінішім бар еді… Біздің ауылда кәсіпкерлікке бет бұрып, өз ісін лайықты жүргізіп отырған жандар жетерлік. Солардың басым бөлігі жастар екендігі көз қуантады. Шыны керек, олардың істеп отырған ілкімді істеріне қарап, кейде қайран қаламын. Сондай-ақ, олар тек ауданның дамуына үлес қосып қана қоймай, жомарт жандар екенін де дәлелдеуде. Дәл қазіргі таңда олар ауылдағы аз қамтылған отбасыларға қолдан келгенше көмек көрсетіп жатыр. Жас болса да үлкендермен үзеңгілесіп, тірлік қылып жүрген жандарды басылым бетінде жазсаңдар, – деп өз өтінішін ортаға тастады.

Өтінішті өзекке теппейтін жан­дармыз ғой! Бірден қабыл алдық та, он мыңнан астам халқы бар Луговой ауылына қарай жол тарттық. Ондағы ең бірінші мақсатымыз – ауылдық округ әкімінің өтінішін орындау. Екіншіден, нәсібін кәсібінен тауып жүрген жастардың жай-күйімен танысу болатын.
Әуелі ауыл әкіміне жолықтық. Ол біздің қолымызға бірнеше кәсіпкердің есімі жазылған тізімді ұстатты. Зер салып едік, Досжан Бейбітов есімді азамат көзімізге оттай басылды.
Өз басым Досжанды бұрыннан танимын. Мен оны өз ісіне ұқыпты, адамдармен тез тіл табыса алатын азаматтар қатарына жатқызамын. Шатаспасам, 2019 жылдың қаңтар айында болуы керек, аталмыш ауылда «Тауман» деп аталатын сауда орталығының лентасын қиып, ресми түрде өз кәсібін бастады. Бүгінде бастаған ісі нәтижесін беріп, бірнеше адамды жұмыспен қамтып отыр.
«Кәсібіміздің түп төркіні ауыл­ша­руашылығымен байланысты. Неге дей­сіздер ғой?! Жауап берейін. Біз отба­сымызбен бұл кәсіпті бастамас бұрын мал шаруашылығымен айналысқан едік. Бүгінде осы салаға толығымен ойыстық. Аллаға шүкір! Дәл қазір жұмысымыз ойдағыдай жүруде. Орталықта азық-түлік пен киім-кешек дүкені, сұлулық салоны бар. Одан бөлек ТЖО және көлік жуу орталығы бар. Бас-аяғы онға жуық адам жұмыс істейді. Енді қайырылымдылыққа келер болсақ, қолдан келгенше жағдайы төмен ауыл тұрғындарына қол ұшын созып тұрамыз. Оның бәрін егжей-тегжейлі айтқанымыз дұрыс болмас,– деп сыпайылық танытты. Досжанның жұмысына сәттілік тілеп, біз келесі кейіпкерімізге жол тарттық.
Біз келесі жолыққан кәсіпкер – Дәурен. Дәурен Құтпанов та өте қарапайым, ұяңдау келген жігіт екен. Ең бастысы – өз ісіне келгенде ұқыпты. Құрылыс материалдарын саудалайтын дүкенінде бәрі өз орнында тұр. Біз барғанда саудаласуға келген әрбір тұтынушыға керегін лезде тауып беріп жүр екен. Ақыры кезек бізге де келді. Келген себебімізді айтып едік, қарсылық танытқан жоқ. Керісінше жылы қабағымен қарсы алып, қойған сұрағымызға қысқа әрі нақты жауап беріп жатты.
«Кәсібіміз 2012 жылы азық-түлік дүкенінен басталды. Әкем аманаттап кеткен кәсіпті биік шыңға жеткізгім келеді. Келешекте кеңейтіп, үлкен сауда орталығын құру жоспарымызда бар. Дейтұрғанмен, қазіргі жағдайымыз да жаман емес. Бүгінде мұнда газ құю бекеті, құрылыс дүкені демалыс­сыз жұмыс істеп тұр. Қазақта «Қайыры­лымдылық – асыл қасиет» деген сөз бар. Бұл тәмсілді біз де берік ұстанамыз. Ауылы­мыздағы жағдайы нашар от­басы­ларға көмек беріп, арнайы қорларға қаржылай қолдау көрсетеміз», – деп жауабын қысқа қайырды.
Үшінші кейіпкеріміз – Нұрсұлтан. Нұрсұлтанды да бала кезден танимын. Жалғыз мен ғана емес, бұл жігітті аудан­дағы біраз азамат танитын бо­лар. Замандасымыз дәл қазір аудан орталығындағы «Жібек жолы» сауда нысанында үйге керекті электронды және техникалық құрал-жабдықтарды саудалаумен айналысады. Бір таң қалғанымыз Нұр­сұлтан кітапты көп оқитын азаматтар қатарынан екен. Жәй емес, бизнеске бастайтын, кәсіп­керлікке кел­тіретін кітапты көп оқитыны сөйлеу мә­нерінен-ақ кө­рініп тұр.
«Кітап оқуды бала кез­ден ұнатамын. Оқыған сайын бағыт-бағдарым ай­қындалып, мәселені шешу жолдарын көріп тұрамын. Білесіздер ме?! Кәсіпті бастамас бұрын аудан орталығын аралап шықтым. Жаяу. «Неге?» деген сұрақ са­на­ңызға сап ете қалған болар… Жауап бе­рей­­ін. Қолымда қойын дәптер мен қа­­ламсап бар. Базар­дан бастап, ауыл­­ша­руа­шы­лығы кол­лед­жіне дейін жолды жү­ріп өттім. «Не бар?» және «Не жоқ?» де­ген сауалдарды өзіме қойып, жауабын жазып келемін. Ақыры бір тоқтамға келіп, адам көп жүретін жерден кәсіп ашуды ұй­ғардым. Биік­тедім. Кейде құлдырадым. Бірақ, бе­ріл­медім. Жа­қын­да­рым­ның қолдауын сезініп, алға баса бердім. Бү­гінде Аллаға шү­кір, өз жолымды тап­қандаймын. Кәсібімді дөңгелетіп, аудан орталығы­нан нысандарды сатып алып, оларды жалға беріп отырмын. Бұл – мен атқарып отырған жұ­мыстың бір бөлігі ғана. Алда әлі талай жос­пар бар. Негізінен кәсіпкердің жолында талай қиын­дық кез­де­се­ді. Соны ең­сер­ген адам ғана өз мақсатына жете алады, – деп болашақ жоспарымен бөлісті.
ТІЛШІ ТҮЙІНІ: Луговой ауылының әкімі айтқан жас кәсіпкер жігіттер осындай. Мақтауға тұрарлық. Жасты­ғына қарамастан, ақылға қонымды тірлік етеді. Бұл – бір. Екіншіден, ауыл әкімінің бір жағына шығып, өз ауылдастарының ауыр халіне бей-жай қарай алмайды. Қолдан келгенше демеп, қолдау көр­сетеді. Бір сөзбен айтқанда, нағыз азаматтар. Меніңше, «Жаңа Қазақстан» дәл осындай жан­дар­мен бірге құрылмақ. Жасаған жақ­сылықтарың екі еселеніп өздеріңе қайтсын, жігіттер!

Жәнібек СҰЛТАН.

Поделиться ссылкой: