Әуесбай Бақбергенұлы Тараз қаласының құрметті азаматы атанды
416 Views
25-қазан Республика күніне орай Тараз қалалық мәслихат шешімімен ардагер ұстаз, өнер қайраткері Әуесбай Бақбергенұлы Тоқпанбетовке «Тараз қаласының құрметті азаматы» атағы берілді. Өнердегі дос ағамыз, әріптесіміз Әукеңді жоғары марапатымен шын жүректен құттықтаймын.
Әуесбай Бақбергенұлы 1951 жылы Жамбыл облысы, бұрынғы Луговой ауданы, Бірлес (қазіргі Сәлімбай) ауылында дүниеге келген. 1973 жылы Өскемен педагогикалық институтын «Ән-күй пәнінің оқытушысы» мамандығы бойынша бітірген.
Еңбек жолын 1973 жылы №5 Жамбыл атындағы мектепте «ән-күй» пәні мұғалімі ретінде бастаған. 40 жылға жуық Абай атындағы Жамбыл гуманитарлық жоғары колледжінде (бұрынғы педагогикалық училище) оқытушы, кафедра меңгерушісі, өнер ұжымдарының жетекшісі болып абыройлы қызмет етті. 1978 жылы Жамбыл облыстық «Алатау» ән-би ансамблінің бишілер тобына сүйемелдеуші баянист болып қосымша жұмысқа шақырылды. Өнер саласының білікті маманы қалалық, облыстық, республикалық деңгейдегі жүздеген мәдени іс-шараның белсенді қатысушысы, әрі ұйымдастырушысы.
Жамбыл облысы Красногор аудандық мәдениет бөлімі меңгерушісі, Луговой аудандық мәдениет үйінің директоры болып та еңбегі жанды. 1984 жылы Красногор ауданында халық ақыны, әнші, сазгер Кенен Әзірбаевтың 100 жылдығын республика ауқымында ұйымдастырушылардың бірі. 100 жылдық мерейтой қарсаңында 1982 жылы Кенен ауылы өнерпаздарының басын қосып, «Ойжайлау» фольклорлық ансамблін құрып, өзі соған жетекшілік етті. 1984 жылы ансамбль ұжымы Алматыда қазақ телевизиясында 45 минуттық жеке концерт беріп, Мәскеуде өткен бүкілодақтық көркемөнерпаздар байқауында лауреат атанды.
Жастарға оқытудың жаңа технологиясының әдіс-тәсілімен білім берген ұстаз сапалы еңбегімен, дәріс берудегі ізденімпаздығымен, ерекше еңбекқорлығымен мәдениет және педагогика саласына зор үлес қосты. Білімгерлердің озық шығармашылық бастамасын жан-жақты қолдаумен қатар, олардың кәсіби шеберлігін шыңдауға мол бағыт-бағдар берді. Әдістемелік жұмыстың бір қыры – ұстаздың өз шәкірттерімен бірге әр жылы шығармашылық концерт беруді дәстүрге айналдырды.
Жамбыл облысында «Тәуелсіз елдің ұлағатты ұстаздары» фестивалінің, «Жүрекке жылы әуендер» ретро әуендер байқауын тұрақты ұйымдастырып, шәкірттерімен бірлесе өнер көрсетті. «Үміт» мамандандырылған бөбектер үйіндегі «Ризашылық», «Қамқоршы түн» аталған түрлі іс-шарада жыл сайын білім алушы жастармен бірге концерттік бағдарлама ұсынды. Облыс ауқымында «Наурыз» мейрамдары, «Сағындырған әндер-ай», «Сағындым Кенен атамды», «Қазақ музыкасының шежіресі» байқауларын ұйымдастырып, белсене өнер көрсетті. Абай атындағы гуманитарлық колледжде «Балауса» қыздар вокалды ансамблі, «Серілер» жігіттер квартетінің негізін қалап, жетекшілік етті.
Әуесбай Бақбергенұлы оқытушылардың ғылыми-практикалық конференцияларында «Қабылдауды дамытудың негізі – музыка мәдениетіне тәрбиелеу», «Жас сырнайшыны алғашқы сүйемелдеу дағдысына оқытудың әдістемесі», «Алғашқы сүйемелдеуге үйрету», «Дина Нұрпейісованың шығармашылығы мен өнерін музыка сабақтарына пайдалану», «Затаевич: «Қазақ халқының 1000 әні» ғылыми конференцияларын ұйымдастырып, талай рет ғылыми баяндама жасады. Тәжірибелі педагогтың жетекшілігімен «Қазақ халқының аспаптық музыкасының жастарға беретін ұлттық тәрбиелік мәні» әдістемелік нұсқауы, «Мектеп балаларын шығармашылық өнерге баулу» әдістемелік құралы жазылды.
Ұлағатты ұстаз музыкалық білім беру саласында педагогикалық мектеп қалыптастырып, есімі қала, облыс, республика көлемінде танымал шәкірт шоғырын тәрбиеледі. Олардың арасында Тараздағы Тұрар Рысқұлов мектебі директоры, білікті педагог маман Бақыт Сапаралиева, Тараз инновациялық-гуманитарлық институты проректоры Гүлшат Қамбарбекқызы, Шәмші Қалдаяқов атындағы халықаралық ән байқауының дипломанттары Светлана Байқұлақова, Назкен Қошқарбаева, «Жас қанат» республикалық жас орындаушылар байқауының дипломанты, Мальта мемлекетіндегі халықаралық ән фестивалі лауреаты, эстрада әншісі Тахмина Әшімбекова, Кенен Әзірбаев атындағы филармония директорының орынбасары, Мәдениет саласының үздігі Жандос Омаров және тағы басқа шәкірттерінің шоқтығы биік.
Ел азаматының өнер және педагогика саласындағы ерен еңбегі сан мәрте еленіп, қалалық, облыстық байқаулардың лауреаты атанды. ҚР Білім және ғылым министрінің Құрмет грамотасымен (2017 ж.), ҚР Білім және ғылым министрлігінің «Ыбырай Алтынсарин» (2010 ж.), «Білім беру ісінің құрметті қызметкері» (2017 ж.), ҚР Мәдениет және спорт министрлігінің «Мәдениет саласының үздігі» (2018 ж.), ҚР Оқу-ағарту министрлігінің «Еңбек ардагері» (2022 ж.) төсбелгілерімен марапатталды. 2018 жылдан Қазақстан педагогикалық ғылымдар академиясының мүшесі. Әуесбай Бақбергенұлының есімі 2020 жылы шыққан «Білімнің жаққан шырағын» атты Жамбыл облысының педагогтары антологиясына енген.
«Құлан таңы» ақпарат.