Қайырымдылық жасасаң, қайырымын өзің көресің
147 Views
Қазіргі таңда елге болысып, жақсылық жасап жүрген көптеген қайырымдылық қорлар бар. Сондай мақсатта құрылып, тұрмыс жағдайына байланысты аз қамтылған отбасыларға көмек қолын созу – «Аққойлы» қоғамдық қайырымдылық қорының да басты миссиясы. Аталмыш қайырымдылық қоры 2021 жылдың 21 желтоқсанында құрылған болатын. Қор төрағасы – Ғалымжан Әбдірайымов.
Құрылған сәтінен бастап, бұл қайырымдылық қордың мүшелері көпбалалы әрі тұрмысы төмен отбасыларына көмек қолын созып келеді. Биыл да сол дәстүрден жаңылмай, Жаңа жыл қарсаңында «Аққойлы» қоғамдық қайырымдылық қоры 7 жанұяға 50 мыңға азық-түлік өнімдерін сатып алып беріп, үлестірді. Қайырымдылық шарасы Абай, Құлан, Ақбұлақ, Көкдөнен және Луговой ауылдық округтерін қамтыды. Қайырымдылық шарасына белсене атсалысқан Бейсенбай Таңбаев, Бексұлтан Боқаев, Бекен Орманбеков, Тұрсынбек Досаев, Есенғали Құралбаев, Есет Нұрахаев, Омар Нұрмашев, Шарафаддин Толыбаев, Сауытбек Иманбаев және Әнуарбек Тұрманбетовтердің есімдерін айрықша атап өтсек болады.
«Құлан таңы» ақпарат.