«Өнердің» өрісі тасыған кеш

Ақпан айында аудан көлемінде көптеген іс-шаралар ұйым­дастырылды. Оны біз аудандық газет бетінде жарияланған мақалалардан оқып, көріп, біліп отырмыз. Мәселен, дәл сондай игі шараның бірін жуырда өз көзімізбен де көрдік.
«Тәуелсіз елдің ұлағатты ұстаздары» атты педагогикалық ұжымдардың көркемөнерпаздары арасындағы шығармашылық фестиваль 4 жыл сайын өтеді. Араға үзіліс салып, биыл бұл фестиваль ерекше форматта ұйымдастырылып отыр. Аудандық білім қызметкерлері кәсіподақ комитетінің ұйымдастыруымен өтетін аталмыш фестивальдің мақсаты – білім беру ұйымдарындағы қызметкерлердің шығармашылық әлеуетін дамытып, көпшілікке насихаттау.
Аталмыш фестиваль аудандық деңгейде әр аймақ бойынша өтіп жатыр. Яғни, әр сенбі күндері білім беру ұйымдары мен балабақша ұжымдарының қызметкерлері сайыс көркін қыздыруда. Мәселен, жақында ғана Көкдөнен ауылдық мәдениет үйінде өткен аталмыш фестивальдің кезекті бір апталығында кәсіподақтың 100 жылдығына орай «Бір бағыт, бір мақсат, бір мүдде» тақырыбы аясында ұйымдастырылған фестивальге 7 орта мектеп пен 2 балабақша ұжымдары қатысып, өз өнерлерін көрсетті.
Фестиваль жеті номинация бойынша, яғни хор, ансамбль, көркем­сөз оқу, вокал, хореография, ориги­налдық жанр және драма жанры бойынша өрбіді. Фестивальға аудандық білім бөлімінің басшысы Майра Базарова, аудандық білім қызметкерлері кәсіподақ комитетінің төрайымы Айнұр Баймұратова, Мэлс Өзбеков атындағы аудандық мәдениет үйінің әртісі Мият Медетов, Мұқан Төлебаев атындағы балалар музыка мектебі директорының тәрбие ісі жөніндегі орынбасары Айдана Құлтасова, Мэлс Өзбеков атындағы аудандық мәдениет үйінің әншісі Нұрлан Әмірбетов және аудандық «Құлан таңы» газетінің тілшісі Марат Диханбай қазылық етті.
Бұл фестивальде Өнер мектебінің ұжымы өздерінің жан-жақты қырларын танытып, ерекше дайындықпен келгенін көрсетті. Оны Өнер мектебінің ұжымы жүлде иеленген номинациялардан-ақ байқауға болады. Мектебіміздің ұстаздары сахнада өздерінің сан қырлы таланттарын ұқтырып, 4 номинация бойынша I дәрежелі, екі номинация бойынша II дәрежелі дипломдармен марапатталды.Ұстаздарымыз жеті бағытта да өнер көрсетті. Соның ішінде хордан ұжым мүшелері, оригиналдық жанрда өнер көрсеткен Рахат Малимбаев пен Жантас Тунгатаров, вокал номи­нациясы бойынша бақ сынаған Ақ­шолпан Пірімқұлова, Ерболат Сады­ханов және Назгүл Самылтырова трио­сы, драма номинациясы бойынша өз рөлдерін асқан шеберлікпен сомдаған Рымтай Елеубаева мен Айбек Нурбеков I дәрежелі дипломдармен марапатталды. Ансамбль, хореография номинациясы бойынша да әріптестеріміз II дәрежелі дип­ломдарға ие болды.
Осының бәрі «Біз әрқашан біргеміз!» деген қағиданы ұстанып, кез келген іске жұдырықтай жұмылып, бірлесіп еңбек ететін Өнер мектебі ұжымының ұлардай ұйып отырған бірлігінің арқасы. Өнер мектебінің директоры Бақытжан Утебаев, директордың орын­басарлары Назгүл Самылтырова мен Эльмира Тыныстанова, ардагер ұстаз Қарлығаш Төреқұлова, жалпы, тұтас­тай алғанда ұжым мүшелерінің барлығы дерлік осы фестивальге бір кісі­дей атсалысты. Бірлесе атқарған еселі ең­бек­тің нәтижесінде осындай мара­паттарға ие болды.

Бағила Досмайлова,
Өнер мектебінің кітапханашысы.

Поделиться ссылкой: