Мүгедек бала асырап отырған ата-аналардың мұң-мұқтажын тыңдады
108 Views
Елімізде көптеген қоғамдық бірлестіктер бар. Олардың дені қоғамдық іс-шараларға белсене атсалысып, елдік мүдде жолында «Барды бар, жоқты жоқ» деп айтып та жатады. «Ақжүніс» аналар қоғамдық бірлестігі де ел арасында қызу талқыға түскен тақырыптарға бей-жай қарамай, өздерінің миссияларын да білдіріп жатады.
«Ақжүніс» аналар қоғамдық бірлестігінің Тұрар Рысқұлов ауданында да филиалы құрылған. Аталмыш қоғамдық бірлестіктің Тұрар Рысқұлов ауданы бойынша филиалының төрайымы – Жанат Даулеталиева. Жанат ханымды талай іс-шараларда көріп жүрміз. Әрқашан тура сөйлеп, әділін айтады. Ол әркез мүгедек бала асырап отырған ата-аналардың құқығын қорғап, шыр-пыр болып жүреді.
Жанат Даулеталиева аудан әкімі Ернар Есіркеповке мүгедек бала асырап отырған ата-аналармен кездесу жөнінде ұсыныс айтқан екен. Ол ұсынысты аудан басшысы да қолдады. Жай ғана қолдап қойған жоқ, кеше «Достық» үйінде мүгедек бала асырап отырған ата-аналармен кездесті.
Кездесу біржақты өткен жоқ. Аса бір мадақтау да айтылған жоқ. Көбінесе мүгедек бала асырап отырған ата-аналардың мұң-мұқтажы тыңдалып, соған сай әрекет ету жоспары сараланды.
Мүгедек бала асырап отырған ата-аналардың аудандық орталық аурухана дәрігерлеріне өкпелері қара қазандай.
Екі сағатқа созылған кездесуде аудан әкімі Ернар Серікәліұлы мүгедек бала асырап отырған ата-аналардың мұң-мұқтажын мұқият тыңдап, оларға тұшымды жауаптар қайтарды. Аудан басшысы аудандық аурухана дәрігерлеріне айтылған сын-ескертпелер сол арада қалып қалмай, басшылық оны біліп, назарға алып, тиісті шаралар қабылдау қажеттігін ескертті. Дәл осындай кездесу форматын алдағы уақытта аудандық деңгейде де ұйымдастыру мәселесі айтылды.
Марат Жолдасбекұлы.