Ерекше балалар – қоғам бөлшегі
146 Views
Өткен аптада «Бұқаралық іс-шараларды дамыту орталығы» КММ-де 2-сәуір Дүниежүзілік аутизм мәселесі туралы ақпарат тарату күніне орай, аудандағы аутизмі бар балалардың қатысуымен спорттық жарыс өткізілді. Аталмыш шараға аудан әкімінің орынбасары Әлібек Мамытжанұлы, «Ақжүніс» аналарды қорғау орталығының директоры Жанат Даулеталиева, аудандық білім бөлімінің инспекторы Жанар Бекбосынова төрелік етті. Спорттық ойын мерекесіне 10-нан астам мүгедек бала, сондай-ақ олардың аналары мен жетекшілері қатысты.
Шарада ерекше балаларға арналған спорт түрлері бойынша жаттығулар мен ойын-жарыстар өткізілді. Спорттық мереке ерекше балаларды заманауи қоғамда әлеуметтік бейімдеу, бала тұлғасының үйлесімді дамуына ықпал ету және инклюзивті қоғамды дамыту мақсатында ұйымдастырылған. Сонымен қатар, мұндай іс-шаралар салауатты өмір салтын насихаттауға және ерекше физикалық қажеттіліктері бар балалар арасында кез келген спорт түрін дамытуға ықпал етеді. Ойын қорытындысы бойынша барлық қатысушыларға естелік сыйлықтар мен медальдар берілді. Сондай-ақ, демеушілер арнайы әзірлеген тәттілерін ұсынды.
Гүлнұр Аманжол.