Той мәдениетіН ҚАЛЫПТАСТЫРУ – УАҚЫТ ТАЛАБЫ

Кеше Шерхан Мұртаза атындағы руханият және тарихтану орталығының директоры Жасұлан Әбдіхалық пен облыстық асабалар қоғамының төрағасы Ринат Нұрақбаев ауданымызға келіп, Мэлс Өзбеков атындағы аудандық мәдениет үйінде той мәдениетін жандандыру мақсатында кездесу өткізді. Аталған жиынға аудан әкімінің орынбасары Қайрат Исмайл, аудандық ардагерлер Кеңесінің төрағасы Қожайхан Бижанов, жергілікті асабалар және дін өкілдері, ардагерлер кеңесінің мүшелері қатысты.
Басқосуда қазіргі той мәдениеті, оның ұлттық құндылықтарымызға сай өтуі және артық шығынсыз ұйым­дастыру жолдары талқыланды.
«Қазіргі таңда қазақтар тек мешіт пен тойда ғана бас қосатын бол­ды. Өкінішке қарай, тойлар өзінің мәрте­бесі­нен айырылып барады. Осы мәселе­ні ескере отырып, орталық қызмет­керлері той мәдениеті тақыры­бын­да методикалық нұсқаулық дайын­дап жатыр. Сондай-ақ, той – тек сауық-сайран емес, ұлттың мәдение­тін танытатын айрықша дәстүр. Оны заманға сай, бірақ ұлттық құнды­лықтарымызды жоғалтпай өткізу – баршаға ортақ міндет», – деді Жасұлан Лесбекұлы.
Кездесу барысында талай жыл ауданда бас имам қызметін атқар­ған Сұлтаншәріп Жадыраев «Тойдағы ысырап­шылдықтың алдын алу – баршамыздың ортақ міндетіміз. Бұл үрдісті реттеу үшін арнайы ас мәзірін белгілеуді ұсынамын» – деген пікірін айтты.
Той – ұлт мәдениетінің айнасы. Оны мән-мағыналы, ысырапсыз өт­кізу – баршамызға ортақ міндет. Кез­десу барысында осы бағытта нақты ұсыныстар айтылып, той мәдениетін жаңғырту жолдары талқыланды. Ұлт­тық дәстүрді сақтай отырып, той өткізу мәдениетін қалыптастыру – уақыт талабы.

«Құлан таңы» ақпарат.

Поделиться ссылкой: