Ауданда жаңа инвестициялық жоба бастау алады

Жуырда аудан әкімі Ернар Есіркепов Алматы облысына арнайы іссапармен барып, бірқатар инвесторлармен кездесті.
Сапар барысында еліміздің сүт өнімдерін өңдеу нарығында қарқынды дамып келе жатқан «NEO MILK» компаниясының басшылығымен жүздесіп, нәтижесінде қос тарап ынты­мақ­тастық туралы меморандумға қол қойды. Келісім аясында зауыт ғима­ратының дәл осындай екінші нұсқа­сын аудан аумағында салу туралы уағдаластыққа қол жеткізілді.
«NEO MILK» – жуырда ғана құрыл­ған, сүт өңдеу саласында инновациялық технологияларды қолданатын компания. Кәсіпорын жылқы, ешкі және түйе сүтінен экологиялық таза өнімдер өнді­реді. Бүгінде компания Алматы облы­сында тәулігіне 50 тоннаға дейін сүт өңдей­тін заманауи зауытты іске қосқан. Ал­дағы уақытта бұл көрсеткішті арттыру көзделуде. Тіпті отандық өнімді Қытай нарығына экспорттау жоспары да бар.
Жоғары сапада дайындалатын «Neo Saumal», «Shubat», «Goat Milk» және құрғатылған сүт өнімі «Мама знает» Қытайдың тауар өндірушілері тарапынан қызығушылық тудырып отыр.
Бұл сұранысты толық қанағат­тан­дыру үшін компания өз көкжиегін кеңейтуге мүдделі. Осыны ескерген кәсіпорын басшылығы шөбі шүйгін, дәрілік өсімдіктер мен минералдарға бай, жазық даласы мен таулы аймағы бар Тұрар Рысқұлов ауданын таңдады. Өз кезегінде компания өкілдері жергілікті әкімдікпен тығыз әріптестік орнатып, өңірдегі сүт өңдеу саласын жаңа дең­гейге көтеруге дайын екендіктерін жеткізді.
Аудан әкімі Ернар Есіркепов өз сөзінде:
– «NEO MILK» сияқты иннова­циялық компаниялардың келуі – аудан экономикасына жаңа серпін беретін, ауылшаруашылығын дамытудағы нақты қадам, – деп атап өтті.
Меморандум аясында қос тарап сүт өндірісін дамыту, ауыл шаруашылығы кооперативтерін қолдау және жергілікті фермерлерден шикізатты бекітілген бағада сатып алу мәселелерін бірлесе жүзеге асыруға келісті.
Төскейі төрт түлікке толы біздің аудан үшін бұл – үлкен мүмкіндік. Жобаның жүзеге асуы – өңір тұрғындарының әл-ауқатын арттырып, жергілікті бюджеттің көлемін ұлғайтатыны сөзсіз.
Сапар барысында аудан әкімі Ернар Есіркепов Оңтүстік Кореяның KT&G компа­ниясының өкілдерімен және бірқатар құрылыс материалдарын өндіретін зауыт басшыларымен де кездесіп, аудан аумағында олардың филиалдарын ашу туралы ұсыныс жасады.

Жәнібек БАЗЫЛБЕК.

Поделиться ссылкой: