Жастар жаңа ғимаратқа  Қоныстанды

Жастар – қоғамның қозғаушы күші. Елдің болашағын да, іргесін де қалайтын осы – жастар. Осыны басты бағдар ретінде ұстанған аудан басшылығы  Тәуелсіздік күні қарсаңында аудандық «Жастар ресурстық орталығының» мамандарын жаңа ғимаратқа қоныстандырып, сәттілік тіледі.

Бүгінде аудандық жастар ресурс­тық орталығында 30-ға жуық маман қызмет етеді. Орталықтың негізгі мақсаты – аудан жастарының бел­сен­ділігін арттырып, сан түрлі шара­ларға тарту және оларға жан-жақ­ты ақпараттық кеңестер беру. Салта­натты ашылу жиынына аудан әкімі Ернар Есіркепов, аудандық ардагерлер Кеңе­сінің төрағасы Қожайхан Бижанов, бір­қатар бөлім басшылары мен соңғы жыл­дары жарқын жетістіктерге же­тіп жүрген жастар қатысты. Айта кету керек, аталмыш ғимараттың ірге­­тасы жаңадан қаланбаған. Бұрын­дары бұл нысан «Азаматтарға арнал­ған үкімет» КЕАҚ облыстық филиа­лының теңгерімінде болған. Бертін келе арнайы келіссөздер жүргізу нәтижесінде ауданның коммуналдық меншігіне қайтарылып, қайта жаңғырту жұмыстары жүргізіліп, бүгінде аудан жастарының бас ғимаратына айналып отыр.

Бұл – жастар саясатын қолдау мақсатында қолға алынған игі баста­малардың бірі.  Аудан әкімі Ернар Есіркепов өзінің құт­тықтау сөзінде аталмыш баянды бастамаға қолдау білдірген әрбір жанға ерекше алғысын жеткізді. Әсіресе келіссөздер жүргізу кезінде белсенділік танытқан ҚР Парламентінің Мәжіліс депутаты Гүлдара Нұрымованың еңбе­гін ерекше атап өтті. Сондай-ақ, жастарды ел дамуы үшін белсенді жұмыс жасап, біріге қызмет етуге шақырды.
Салтанатты жиында аудандық арда­герлер Кеңесінің төрағасы Қожайхан Бижанов та сөз сөйлеп, Тәуелсіздіктің алғашқы жылдары мен қазіргі кезеңді салыстыра отырып, бүгінгі жастарға жасалып жатқан жақсылықтардың көбін айтып, мемлекеттік бағдарламалар зор мүмкіндіктер сыйлайтынын жеткізді.
Жиын соңында аудан дамуына өзіндік үлес қосып жүрген жастар арнайы марапатталды.

Жәнібек БАЗЫЛБЕК.

Поделиться ссылкой: