Мас жүргізуші бас бостандығынан айырылды
12 Views
Тұрар Рысқұлов ауданының соты көлік құралдарын басқару құқығынан айырылған адам бола отырып, масаң күйінде көлік құралын басқарған К.-ға қатысты қылмыстық істі қарады (ҚК 346-бабының 1-бөлігі).
Сотпен анықталғаны:
Сотталушы К. 2022 жылы 7 жыл мерзімге көлік құралдарының барлық түрлерін басқару құқығынан айырылып, 2025 жылдың желтоқсанында досының көлігін мас күйінде басқарған. Оны полиция қызметкерлері Қарақат ауылының бір көшесінде тоқтатып, медициналық куәландыруға жеткізген.
К-нің кінәсі іске қатысушылардың айғақтарымен, медициналық қорытындымен және істің басқа да материалдарымен расталды.
Тараптардың позициясы
Прокурор сотталушыны 2 жылға бас бостандығынан айыруды сұрады.Сотталушы өз кінәсін толық мойындап, оған жеңіл жаза тағайындауды сұрады.
Сот үкімі
ҚК 346-бабы 1-бөлігінің санкциясы 5000 АЕК-ке дейiнгi мөлшерде айыппұл салу не сол мөлшерде түзеу жұмыстары немесе 1200 сағатқа дейiнгi мерзiмге қоғамдық жұмыстарға тарту, не болмаса 5 жылға дейінгі мерзімге бас бостандығын шектеу немесе айыру түріндегі жазаны көздейді.
Сот кінәні мойындауды және оның оң қырынан сипатталуын жеңілдететін мән-жайлар ретінде таныды. Ауырлататын мән-жайлар анықталған жоқ.
Сот үкімімен К. ҚК 346-бабының 1-бөлігі бойынша кінәлі деп танылып, оған көлік құралын басқару құқығынан өмір бойына айыра отырып, 1 жыл 6 ай бас бостандығынан айыру жазасы тағайындалды.
«Құлан таңы» ақпарат.