Жастар – жасампаз істердің жаршысы

943 Views

Сәрсенбі күні Мэлс Өзбеков атын­дағы аудандық мәдениет үйінде «Жалынды жастармен — жарқын бо­лашаққа» деген тақырыпта жастар форумы өтті. Форумға аудан әкімі Ерболат Садырқұлов, аудан әкімінің орынбасары Бейсенбек Әлпейісов, аудандық мәслихат хатшысы Тұрсынхан Жаманбаев, аудандық Қоғамдық кеңестің хатшысы Пазыл Сүлейменов, аудан әкімдігінің бөлім басшылары, жас кәсіпкерлер, белсенді жастар және БАҚ өкілдері қатысты. Форумда ең алғаш болып аудан әкімі Ерболат Садырқұлов сөз сөйледі. Аудан басшысы сөзінде:
– Қазақстан Республикасының Тұңғыш Президенті-Елбасы Нұрсұлтан Назарбаев ел егемендігін алған жыл­дардан бастап, үздіксіз жастар саяса­тын дамытуға ерекше мән беріп, жастар­дың бастамаларын әркез қолдап кел­ді. Өйткені, жастар, қай кезде де қоғам­ның қозғаушы күші әрі жарқын істер­дің жаршысы. Мен бүгінде елімізде жас­тар саясатының жоғары деңгейде жү­зеге асырылып, өскелең ұрпаққа үкі­мет тарапынан зор қолдаулар жаса­лып жат­қанын айтқым келеді. Құрметті форумға қатысушы белсенді жастар! Жақында аудандық «Жастар ресурс­тық орталығы» КММ-нің директорына ауданның белсенді жастарымен бес бағытта жұмыс атқаруды тапсырдым.Біріншіден, аудан аумағында жастар кәсіпкерлігін дамытып, шағын бизнестің өркендеуіне жол ашу. Әрбір жас табыстың тайқазанын тасытып, өзінің шама-шарқы мен бейіміне қарай кәсіп меңгеріп, шағын бизнес көзін ашса, ол өз отбасына да, елге де пайда келтіріп, тұрмыс жағ­дайын жақсарта алады. Аудандық кә­сіпкерлер палатасы мен жастар ресурстық орталығының арасында Меморандумға қол қойылып, нақты іс-шаралар бекітілуі тиіс. Екін­шіден, жұмыссыз жастар санын азайтып, нә­тижелі жұмыспен қамту шараларын жүзеге асыру. Стартап жобалар мен тың идеялар, ешкімде жоқ құнды биз­нес көзін тапқан жан өзіне де өзгеге де жұмыс орнын қамтамасыз ете алады. Бос жүрген жастар саны азаяды, отба­сы беріктігі мен жастар арасындағы келеңсіз оқиғалардың жо­лы тыйыла­ды. Жастардың өмір сүруге құлшыныс­тары оянып, ертеңіне деген сенімі артады. Үшіншіден, ауданда жастар арасында салауатты өмір сал­тын ұста­ну арқылы бұқаралық спорт­ты дамы­ту. Бұл – ел саясатының маңызды сала­сы. Денсаулық – зор байлық. Тәні сау адамның жаны да сау. Зиянды әдет­тер­ді шектеу, өскелең ұрпаққа денсау­лықты қадірлеп, спортпен шұғылдану­ға бағыт-бағдар беру – әр азаматтың ай­нымас борышы болуы тиіс. Елімізді әлемге танытар саңлақ спортшылар ауыл балаларынан шығады. Сондық­тан таланттың талабын тани білу — күн­делікті жұмыстан көрініс табуы тиіс. Бұқаралық спорт жалпы халықтың бас қосар ортасы болуына күш салуымыз қажет.Төртіншіден, туған жердің тарихын танытып, табиғат байлығы мен тазалығын сақтау үшін жастар туризмін, оның ішінде, экотуризм мен өлкенің ішкі туризмі саласын жандандыруды қолға алу. Бесіншіден, жастардың ауыл, аудан өміріндегі қоғамдық шаралар­ға, мәдени-көпшілік жұмыстарға қаты­су белсенділігін арттыру. Бүгінгі фо­рум аясында осы мәселелер талқыла­нып, өздеріңіздің ұсыныстарыңыз еске­ріле отырып, тиісті құжаттар қабылдана­ды. Алдағы жылы атқарылар жұмыстар­­­­дың бағыты, мақсат-міндеті айқындала­­­­ды. Ал бұл шараның жүзеге асыры­­луы үшін ұйымшылдықпен атсалысу – әр­бір жастың азаматтық парызы деп біле­­мін.
Құрметті форумға қатысушылар! Жуырда ғана облыс әкімі Асқар Исабекұлының бастамасымен өңір ау­мағында қолдау тауып, жүзеге асы­ры­лып жатқан «Елдік елге байланысты» атты Үндеудегі берілген ұсыныстардың да аудан аумағында орындалуының көш басында жастардың болуы көп мәселенің оңтайлы шешілуіне ықпал етеді. Әрбір жас қоғамдағы өзгеріс­тер мен әрекеттерді өзінен бастаса ғана нәтижеге қол жеткізуге болады. Сондықтан да барлық жастарды Үндеу аясында атқарылып жатқан жұмыстарда барынша белсенді болу­ға шақырамын,-деді. Содан соң, аудан­дық «Жастар ресурстық орталығы» КММ-нің директоры Айбек Сәрсеханұлына сөз берілді.«Армысыздар құрметті жастар! Әр­бір қоғамда жастардың орны ерекше. Олар халықтың, ұлттың болашағын айқындайды. Бүгінгі таңда Тұрар Рысқұлов ауданы халқының үштен бірі – жастар. Елбасының салиқалы сая­сатын жүзеге асырып, болашақтың тұт­қасы болар ауданымыздың жас­тары өңір­де толайым тірліктер тынды­рып, қоғамға бір кісідей атсалысып келеді.
Жастардың ілкімді іс-шараларына қолдау көрсетуде аудан әкім­дігінің өнеркәсіп және кәсіп­керлік, мәдениет және тілдерді да­мыту, денешынықтыру және спорт бөлімдерінің, сондай-ақ, халық­ты жұ­мыспен қамту орталығы басшы­ларының қосатын үлесі өте зор. Сол се­бепті, «Жастар ресурстық орталы­ғы» КММ мен аталмыш бөлім жә­не мекеме басшысы арасында өзара ынтымақтастықты қалыптастыру мақ­сатында іс-шаралар жоспары бекітіліп, арнайы Ме­мо­рандум дайындалды.
Меморандум аясында жастарымыз жұ­мыспен қамтудың белсенді шара­ларына тарту, салауатты өмір салтын қалыптастыру, оларға мәдени-рухани қолдау көрсету жұмыстары жүзеге асырылатын болады.
Құрметті форумға қатысушылар! Ендігі кезекте аудан жастарын қолдау мақсатында 2020 жылы атқарылатын жұмыстар туралы айтып өтсем деймін.
2019 жылдың қараша айының 16-ы күні аудан әкімдігі мен «Жастар ресурстық орталығы» КММ бастамасымен ауданның тари­хи-ар­хео­ло­гиялық орындарымен таныс­ты­ру, патриоттық сана-сезімін нығайту, жастарды іс-шараға қатыстыру ар­қылы қоғамдық-саяси өмірге тарту, экотуризмді дамыту мақсатында «Ту­ған жердің тарихы – тұнған шежіре» атты тарихи – танымдық экскурсия бас­тауын алды. Экскурсия мүшелері 1 марш­рут бойынша Қарақыстақ тау шат­қа­лында болып, ондағы бай өлке­нің тарихымен танысты. Жаңатұр­мыс пен Қайыңды ауылдарының арасын алып жатқан бай өлкемізде 17 марш­рут белгіленді. Келесі кезекте белсен­ді жастарымыз әр аптаның сенбі күн­дері белгіленген маршруттар бойын­ша экскурсия жұмысына қатыса ала­ды. Жыл бойы жалғасын табатын экскур­сия жұмысындағы жинақталған мәліметтер қағазға түсіріліп, «Құланның киелі мекендері» атты кітап шығару жоспарланып отыр. Мемлекет басшысы Қасым-Жомарт Тоқаев келер жылды «Еріктілер жылы» деп белгілеген болатын. Осыған орай, ауданда «Еріктілер» базасы қайта жасақталып, тұжырымдамасы бекітілетін болады. Тұжырымдаманы іске асыру барысында 2 мақсатты бағыт арқылы жұмыс жасайтын боламыз. Ол мынадай. Әлеуметтік бағыт – қоғамның әлжуаз топтарына мүмкіндігі шектеулі жандарға, жетімдерге, қарияларға көмек көрсету, тұрмыс жағдайына жәрдем беріп, қоғамға бейімдеу. Рухани бағыт – өмірлік мақсаты мен жоспары айқын емес, мүмкіндіктерін пайдалана алмай жүрген жастарға жол көрсету, қоғамдағы жағымсыз дерттерден аластату арқылы еңбек етуге шақыру. Сондай – ақ, аудан жастарын ақпараттандыруға бағытталған «Көшпелі кеңес беру алаңын» ұйымдастыру жоспарлануда. Басты мақсат – түрлі санаттағы жастарға, әлеуметтік сала мамандарын тарта отырып, мемлекеттік бағдарламалар бойынша консультациялық көмек көрсетіп, ауылдық округтегі жастардың проблемалық мәселелерін шешу. «Көшпелі кеңес беру алаңын» ұйымдастыру барысында бос жұмыс орындары жәрмеңкелері өткізіледі.
Талпынысы таудай, алдында мақсаты бар өршіл жастың тіршілігіне ел тамсанып та, таңданып та қарайды. Олардың бойындағы жастық жігері талай белестерді, асуларды, шыңдарды бағындыруға жетеді. Біздің еліміздің болашағы зор. Замандастарымды мақсат пен ізденіске, еңбекқорлық пен табандылыққа шақырамын. Ата-бабамыз сенген, еліміз үміт еткен мүмкіндіктерді жүзеге асыратын кез келді. Өрлеудің қозғаушы күші – біз секілді жастар. Ертеңгі болашақ біздің таңдауымызға байланысты. Жастардың жасампаз үні әрдайым жарқын болсын!» деді жастар ресурстық орталығының директоры өз баяндамасында. Бұдан соң, аудан әкімдігі денешынықтыру және спорт бөлімінің басшысы Ерлік Шабеев баяндама жасады. Өз баяндамасында:
– Спорттың адам өмірінде алатын орны зор екендігін бәріміз білеміз. Спортпен айналысқан адамның денсаулығы мықты, өзі шыдамды болады. Дана халқымыз «Тәні саудың — жаны сау» деп бекер айтпаған. Біздің ауданымыз кеңес дәуірінен бері спорт саласында айтарлықтай жетістіктерге жеткен. Айта кететін болсақ, «Луговой жылқы зауытының» «Абсент» атты сайгүлігі 1960 жылы Рим қаласында өткен Олимпиада ойындарында алтын жүлде жеңіп алса, 1964, 1968 жылғы Токио мен Мехикода өткен Олимпиада ойындарында қола жүлде еншілеп, ауданымыздың атын күллі әлемге танытты. Тәуелсіздік жылдарында да ауданымыз спорт саласында қөптеген жетістіктерге қол жеткізді. Егемен Қазақстанымыздың көк байрағын Олимпиада тұғырында желбіретіп, қазақтың атын шығарып, әлемге танытқан жерлесіміз Ермахан Ибраимов бокстан 1996 жылы Атлантада өткен Олимпиада ойындарында қола медаль, ал 2000 жылы Сидней қаласында ал­тын медаль жеңіп алды. Ислам Байрамуков еркін күрестен 1996 жылы Атлантада өткен Олимпиада ойындарында үздік 6 спортшының қатарына енсе, 2000 жылы Сиднейде күміс жүлдегер атанды. Даңқты жерлесіміз Ақжүрек Таңатаров та еркін күрестен 2012 жылы Лондонда өткен Олимпиада ойындарында ел қоржынына қола жүлде салды. Дзюдодан 2016 жылы Рио Олимпиадасында жүлделі II орын­ды жеңіп алған Елдос Сметовте біз мақтанышпен айтып жүретін азаматтың бірі. Бүгінгі күнде ауданымыздың қоржынында 7 Олимпиада медальдары бар. Ағалар салған ізді жалғап келе жатқан жас спортшыларымыз да әлемдік жарыстарда жеңістерге жетіп жүр. Әлішер Ерғали, Ақерке Наурызбаева, Адина Қалдыбай, Дана Дидайдың есімдерін сол тізімге енгізсек болады.
Спорт — денсаулықтың кепілі. Спорт сөзінің мағынасы кең. Дене тәрбиесі соның құрамдас бөлігі, дәлі­рек айтқанда, бастапқы баспалдағы. Онымен тұрақты шұғылданған адам­ның денсаулығы мықты болмақ. Бұл өз кезегінде жақсы оқуға, жемісті ең­бек етуге деген ынта-жігерді арттырады. Ал жасампаз еңбек елдің табысын есе­лей­ді, даңқын асқақтатады. Денсау­лығы мықты, бойында қуат күші мол, жан-жақты дамыған адам — Отаншыл ке­леді.
Құрметті форумға қатысушы жас­тар! Сондықтан сіздерді спортпен шұ­ғылдануға шақырамын,-деді ол.
Содан кейін аудан әкімдігі мәде­ниет және тілдерді дамыту бөлімінің басшысы Нұрдәулет Жамалбековке сөз кезегі берілді.
– Аудан халқының мәдени, ру­хани талап-тілегін қанағаттандыру жо­лында мәдени-көпшілік жұмыстарын ұйымдастыру бағытында Мэлс Өзбеков атындағы аудандық мәдениет үйі, «Сұлутөр» кинотеатры, 7 ауыл­дық мәдениет үйі мен 13 ауылдық клуб, 31 кітапхана, 53 мәдениет оша­ғы тұрғындарға мәдени қызмет көрсету­де. Мәдениет үйі жанында 50 үйірме, 10 әуесқой клуб («Балалар», «Жас жеткіншек», «Ақ әже», «Ақ босаға», «Демалыс», «Мұрагер», «Қолөнер» әуесқой клубтары), «Тамаша» ойын-сауық отауы, 5 халықтық атағы бар ұжымдар («Сұлутөр» халықтық фольклорлық ән-би ансамблі, «Сударушка» халықтық фольклорлық ансамблі, «Әдемі-ау» халықтық ән-би ансамблі, Басқар Битанов атындағы халықтық театр», «Сұлутөр» вокалды халықтық инструментальды ансамбль ұжымдары) мен қазақ, орыс, өзбек, қарашай этномәдени бірлестіктері халыққа мәдени қызмет көрсетеді-дей келіп, үстіміздегі жылы атқарылатын ау­қым­ды жұмыстарды сөз етті. Қысқа­сы үстіміздегі жылы жастармен бөлі­сер жағымды жаңалықтары көп мәде­ниет және тілдерді дамыту бөлімінің. Яғни, Нұрдәулет Сүйерханұлы 2019 жылы 600 ден аса іс-шара өткізілсе, 2020 жы­лы да бұл көрсеткіш жоспар­лан­­ған межеден ауқымды боларын тілге тиек етті.
Одан кейін Тұрар Рысқұлов атын­дағы мектеп-лицейінің ағылшын тілі пәнінің мұғалімі, белсенді жас Дулат Құддыс мінбеге көтеріліп, аудан әкімі Ерболат Садырқұловтың бастамасымен өткен форумда облыс әкімінің Үндеуіне қатысты өз ойын айтты. Алғыр мұғалімнің сөйлеген сөздерінің мәтіні төмендегідей:
– Біздер, жастар, Қазақстанды XXI ғасырда гүлденген, іргесі берік, әлемдік қауымдастықтағы мәртебелі мемлекетке айналдыруға бағытталған мемлекет саясатын жүзеге асыруға дайынбыз. Алдымызда тарихи маңызы зор мереке – Тәуелсіздігіміздің 30 жылдығы келе жатыр. Осы айтулы мерекені жарқын істермен, тың жаңалықтармен қарсы алуды басты мақсат санаймыз. Біздің жастық жігеріміз бен еселі еңбегіміз Тәуелсіз Қазақстанның дамуына бағытталатын болады. Ұлы құндылықтарды ұлықтай білу – әрбір жастың, мына отырған баршамыздың жауапкершілігіміз. Біздер Елбасы Нұрсұлтан Әбішұлы Назарбаевтың «Болашаққа бағдар: рухани жаңғыру», «Ұлы даланың жеті қыры» атты бағдарламалық мақалаларында көзделген межелі міндеттерді атқарып, Ұлы даланы әлемге танытуда нақтыланған құндылықтарды дәріптеп, өзгелерге насихаттауға бар күш жігерімізді саламыз.
Туған жер тарихы баға жетпес байлық. Осынау рухани құндылықты жастар мен өскелең ұрпаққа ұғындыруда тарихи-танымдық шаралар мен мұражайдың, ауылдың көнекөз қариялары мен еңбек ардагерлерінің естеліктері арқылы ауыл мұражайын қалыптастырып, өңір, өлке тарихын жүйелеу жұмыстары да жастар көңіл аударатын басты мәселе болуы тиіс. Өткені, тарих — болашаққа бағдар. Ал тарих ұмытылмас үшін оны насихаттау маңызды жұмыс екенін айту ләзім.
Келер жыл «Еріктілер жылы» болмақ. Осыған байланысты ерікті жас­тардың тобын біріктіріп, аудан­ның өркендеуі жолындағы игі істер­дің көп болуына басымдық берілуі тиіс. Қамқорлыққа аса зәру жандарға кө­мек қолын созып, қоғамдағы бар­лық саяи-қоғамдық, мәдени-рухани іс-шаралардың алдыңғы шебінен ерік­ті жастар тобын көбірек кездестіру қалыпты жағдайға айналуы тиіс. Үстіміздегі жылы Ұлы Жеңістің 75, ел Конституциясының 25, Әбу Насыр әл-Фарабидің 1150, Ұлы Абайдың 175 жылдығын ауқымды масштабта атап өтеміз. Осы шаралардың көшбасшысы да жастар, қолдаушысы — аудан халқы болуы тиіс. Құрметті жастар, киелі Құлан жерінің әлеуетін арттырып, ау­дан экономикасы мен халықтың тұр­мыс жағдайын жақсартып, салауатты өмір салтын қалыптастыруға бағыттал­ған форумдағы ұсыныстарға барша­ңыз­ды үлес қосуға шақырамыз,-деді Дулат Құддыс.
Форум соңында аудан әкімдігінің кәсіпкерлік және өнеркәсіп, мәдениет және тілдерді дамыту, денешынықты­ру және спорт бөлімдерінің басшыла­ры Сақтасын Тастанов, Нұрдәулет Жамалбеков, Ерлік Шабеев және халықты жұмыспен қамту орталығының директоры Сапар Құлманов пен жастар ресурстық орталығының директоры Айбек Сәрсеханұлы өзара ынтымақтастықты қалыптастыру мақсатында дайындалған тиісті Меморандумға қол қойды.

Марат Диханбай.

Поделиться ссылкой: