Кәсіподақ мүшелерімен кездесті

577 Views

Жыл күнтүзбесінде кәсіби мерекелер өте көп. Солардың ішінде 10 қазан – кәсіподақ мүшелерінің кәсіби мерекесі болып бекітілген. Осы бір айтулы мереке қарсаңында аудан әкімдігінің үлкен мәжіліс залында жиын өтті. Оған аудан әкімі Ерболат Садырқұлов, ішкі саясат бөлімінің басшысы Ләззат Өтеулиева, аудандық ақсақалдар Кеңесінің төрағасы Қожайхан Бижанов және әр салада аянбай еңбек етіп жүрген кәсіподақ мүшелері мен ардагерлері қатысты.

Кәсіподақ ұйымдарының ең басты мақсаты — еңбек адамының мүддесін қорғау. Сондай-ақ, кәсіподақ қозғалысын дамыту, оны әрмен қарай жандандыру бастауыш ұйымдарының маңызды міндеттерінің бірі. Біздің ауданда аталмыш сала бойынша атқарылып жатқан жұмыстар да жетерлік. Атап айтар болсақ, ауданда мәдениет, денсаулық, спорт, білім, банк және мемлекеттік қызметкерлер­дің мүддесін қорғайтын бастауыш кәсіподақ ұйымдары нәтижелі жұмыс атқаруда.
Кездесу барысында алғашқы болып сөз алған аудан басшысы Ерболат Салқынбекұлы жоғарыда аты аталып өткен кәсіподақ ұйымдарының жұмысына өзінің жоғары бағасын берді. Сонымен қатар, әрбір салада, әрбір ұжымда кәсіподақ ұйымдарының ерекше рөл атқаратындығын жеткізіп, ұтымды ұсынысын ортаға салды. «Біздің аудан аграрлы аймақ болып саналатындықтан, осы саланың жұ­мы­сын қайта зерделеп көруіміз қажет. Се­бебі, аудан кірісінің басым көп­ші­лігі осы саланың жұмыс нәти­же­сіне тікелей байланысты. Онда қызмет ететін әрбір адамға айрықша назар аударып, олардың мүддесін барынша қорғауымыз қажет, — деп орамды ойымен бөлісті. Сондай-ақ, аудан әкімі қазіргі таңда білім сала­сының қызметкерлеріне жіті көңіл бөлініп отырғандығын нақ­ты атап өтті. «Еліміздің тірегі болып есептелетін кейінгі толқын ұрпақты тәрбие­леп отырған ұстаздардың қоғамдағы рөлі орасан зор. Сол себепті де, мұғалімдердің мүддесін қолдан келгенше қорғауымыз қажет. Былтыр білім саласының қызметкерлерімен кездескенімде ұстаздардың тарапынан өте маңызды мәселелер көтерілген болатын. Олардың бәрін орындай алмасақ та, бірқатарын нақты жүзеге асырдық. Егер де өзге де кәсіподақ ұйымдарында дәл осындай ұсыныстар болатын болса, тыңдауға әзірміз» деп кәсіподақ мүшелерін келіп жеткен кәсіби мерекелерімен құттықтап, жұмыстарына сәттілік тіледі.
Кездесу барысында аудандық ардагерлер Кеңесінің төрағасы Қожайхан Бижанов та өзінің ізгі тілегін арнап, кәсіподақ ұйымдары­ның маңыздылығы жөнінде кеңінен ой қозғады. Ізінен бастауыш кәсіподақ ұйымдарының төрайымдары мен төрағалары сөз сөйлеп, жыл бойы атқарған жұмыстарын қысқаша баяндап берді. Олардың қатарында З. Оразалиева, Ш. Сәрсенқұлова, А.Баймұратова, А.Ақберді сын­ды кәсіподақ жетек­шілері бар. Баянда­машы­лардың оябы бөлек сүбел сөз­дерінен көптеген жұ­мыстардың атқа­рылғандығын аңғардық. Атап айтар болсақ, кәсіп­одақ жетекшілері өздері­не келіп түс­кен арыз-шағымдарды, еңбекке қатысты даулы мәселелерді Заң аясында шешуге тырысыпты. Соны­мен қатар, кейбір қызметкерлердің қосымша жұмыстарына төленетін еңбекақы мәселесі де аудан әкімінің ықпалымен өз шешімін тауыпты. Бұл туралы білім саласы қызметкерлерінің кәсіподақ ұйымының төрайымы Айнұр Манатбекқызы мәлімдеп берді. Оның айтуынша, әдістемелік бірлес­тік жетекшілеріне қосымша жұмысы үшін төленетін еңбекақы қайта қал­пына келтіріліп, бүгінде төленіп жа­тыр екен. Сол үшін кәсіподақ ұйымы­ның төрайымы аталмыш жұмыстар­дың жандануына ерекше қолдау білдір­ген аудан әкімі Ерболат Садырқұлов­қа өз ризашылдығын білдіріп, шексіз алғысын жеткізді.
Алғыс арқалаған аудан әкімі кез­десу соңына қарай мәдениет, білім, денсаулық, спорт салаларының бел­сен­ді қызметкерлері мен ардагерлерін ма­рапаттап, арнайы сыйлықтар табыс етті. Одан соң кәсіподақ ардагерлері­мен жеке тілдесіп, ұсыныс-тілектеріне құлақ түрді.

Жәнібек БАЗЫЛБЕКОВ.

Поделиться ссылкой: