Жастар атқарған жұмыс жүйелі

772 Views

Бүгінгі күні аудан көлемінде жастар ресурстық орталығы қызметкерлерінің белсенділік танытып, біршама іске мұрындық болып жүргені баршамызға мәлім. Мемлекет басшысы Қасым-Жомарт Кемелұлы Тоқаевтың Қазақстан халқына арналған Жолдауын іске асыру мақсатында түрлі жобалар қолға алынып жатыр. Оның ішінде аудан көлемінде атқарылып жүрген іс-шараларды атап айтсақ болады. Осы орайда аудандық «Жастар ресурстық орталығы» КММ-нің директоры Айбек Сәрсеханұлымен кездесіп, сұхбат құрған едік.

– Айбек Сәрсеханұлы, Елбасы Нұрсұлтан Назарбаевтың «Бола­шақ­қа бағдар: рухани жаң­ғыру» атты бағдарламалық мақа­ласын­да, Мемлекет басшысы Қасым-Жомарт Тоқаевтың Қазақстан хал­қына ар­наған Жолдауында елдің бүгіні мен болашағына бағыт­­талған түйткілді мәселелер қа­рас­­тырылғаны сіз бен бізге мә­лім. Сіздер де жыл басынан бері Президент тапсырмасына айрықша көңіл бөліп келесіздер. Атқарылған жұмыстарыңыз жайлы баян­дап берсеңіз?
– Жалпы Т.Рысқұлов аудандық «Жастар ресурстық орталығы» ком­муналдық мемлекеттік мекемесі Қазақстан Республикасының «Мемлекеттік жастар саясаты туралы» Заңының және «Қазақстан 2020: болашаққа жол» мемлекеттік жас­тар саясатының 2020 жылға дейін­гі тұжырымдамасының ІІ кезеңін жер­гілікті жерде іске асырып жатыр. Бұл тұрғыдан алып қарайтын болсақ, түрлі іс-шаралар мен жобаларды ұйымдастырып, жастар саясатына айтарлықтай үлес қосып жатырмыз. Соның ішінде Елбасының «Болашақ­қа бағдар: рухани жаңғыру» мақа­ла­сын іске асыру бойынша 2020 жыл­дың 9 айында 21 іс-шара өткізілді. Іс-шаралардың тек ұранды болуына емес, тәлім мен тәрбиені қатар ұстап, мағыналы да мәнді болуына көңіл бөлдік. Статистикаға көз жүгіртер болсақ, Т.Рысқұлов ауданы бойынша 2020 жылы тұрғындар саны 64 443 адам болса, оның ішінде жастар саны 14 453 адамды құрайды. Бұл жалпы халық­тың 22 пайызы. Олардың 7760 адамы ерлер, 6693 адамы арулар. «Жастар ресурстық орталығы» коммуналдық мемлекеттік мекемесінде штаттық кесте бойын­ша барлығы 24 қызметкер барын­ша еңбек етіп, халық арасында үгіт-насихат жұмыстарын жүргізіп жатыр. Осы дүниелерді ескерсек, ат­қарып жатқан іс-әрекеттеріміздің ныспысы жұртшылық тарапынан дұрыс көзқарасқа ие деп ойлаймын.
– Қазіргі таңда аудан көлемін­де ғана емес, мемлекетімізде жұ­мыссыздық деңгейі жоғарылап бара жатыр. Жоғары оқу орнын тәмамдаған жастардың тұрақты жұмыс орнын таба алмай, сенделіп жүргенін теледидардан естіп те, көріп те жүрміз. Қазіргі қоғам дерті десек те артық етпес. Алайда осы мәселені оңтайлы шешу үшін сіздер қандай жобалар жасап жүрсіздер?
– Шындығына келер болсақ, сіз­бен толық келісемін. Бүгінгі күні елімізде жұмыссыз жүрген жандар саны өте көп. Оны мен өзімнің тұр­ғыластарымның арасынан да бай­қаймын. Осы бағытта Т.Рысқұлов ауданында NEET жастарының ба­засы жасақталды. NEET жастары де­геніміз – 6 айдан аса уақытта жұ­мыс жасамаған, біліктілігін арттыр­ма­ған, атқарушы органдарда тіркел­меген 18 бен 28 жас аралығындағы жастар. NEET жастар санаты жыл басында 51 жасты құраған, ал 2020 жылдың 7 ай қорытындысы бойынша 49 жасқа жетті. Т.Рысқұлов аудандық «Жастар ресурстық орталығы» осы жастар базасын анықтап, көлемді жұ­мыстар атқарып жүрген жайы бар. Зерделеу жұмысы барысында біз ау­дан жастарымен кездесіп, олардың ой-пікірлерін білген болатынбыз. Со­нымен қатар, жастар зиянды нәр­се­лер­ге үйір бола бастады. Ішімдікке салы­нып, қылмыспен айналысып жүрген жан­­дар өз болашағына балта шауып жа­тыр. Сол себепті, жастар арасында қыл­­мыс­тың алдын алу бойынша жыл ба­сы­нан бері ауылдық полиция бөлімі маманда­­ры­­мен бірлесе отырып, 2 кездесу, 3 дөңгелек үстел отырысы, 5 рейд жұмыстары, 7 акция өткізілді.
– Бүгінгі күні ауылдық аймақ­та тұрғылықты тұратын адамдар саны күрт азайып бара жатыр. Жас­­та­рымыздың дені қалаға оқуға барып, ақыр аяғында сол жақта тұ­рақтап қалуда. Мемлекет бас­шы­сы осы мәселе бойынша бір­қа­тар тап­сырмаларды күн тәртібіне қойды. Бұл бағыт бойынша аудан көле­мін­де атқарылып жатқан істер ту­ралы айта кетсеңіз?
– Әрине, жастардың білім алып, қалада еңбек етіп, ел болашағына өз үлестерін қосып жатқандарын құп­таймын. Білімнің, ғылымның ошағы қалада. Алайда біздің түп тамыры­мыз ауылда емес пе? Ал тамыр жойылса, алып бәйтеректің өзі де құлайды. Сондықтан мемлекет тапсырмасы бойынша бекітілген «Дипломмен ауылға» бағдарламасы біздің аудан­да кең көлемде жүргізіліп жатыр. «Дипломмен ауылға» бағдарламасы аясында тұрғын үй несиесіне 38 маманға 159060,0 теңге қарастыры­лып, 15 маманға көтерме жәрдем ақы берілді. Жастар саясаты мәселелері бас­қармасы және аудан әкімі арасын­да межелер айқындалып, 7 индикатор­лық көрсеткіш өңір жастарын жұ­мыс­пен қамтудың белсенді шараларына тартуға бағытталды. Аталған келісім аясында 710 жасты жұмыспен қамту белгіленген. Оның ішінде, жастарды ваканттық бос жұмыс орындарына, жастар практикасына, әлеуметтік жұ­мыс орындарына, ақылы қоғамдық жұмыс орындарына, кәсіби оқудан өткізуге, кәсіпкерлік негіздерін оқы­ту­ға және шағын несие алуы қарал­ған. Есепті кезеңде 711 жас жұмыспен қамтудың белсенді шараларына тар­тылған. Оның ішінде: ваканттық бос жұмыс орындарына – 283, жастар практикасына – 82, әлеуметтік жұмыс орындарына – 5, ақылы қоғамдық жұмыс орындарына – 235, кәсіби оқуға – 10, кәсіпкерлік негіздерін оқуға – 50, микро кредит алуға – 46 жас қамтылған.
– Айбек Сәрсеханұлы, осы жы­­лы адамзаттық ойларды алға тарт­қан Әбу Насыр әл-Фараби баба­мыз­дың туылғанына 1150, ал қазақ жазба әде­биетінің негізін қалаған ха­кім Абай Құнанбайұлы­ның дүниеге келгеніне 175 жыл толғанын өзіңіз де жақсы білесіз. Мемлекет көле­мінде аты аталған тұлға­лар­дың шығармаларын насихаттау үшін түрлі челлендждер, акциялар, жобалар ұйымдастырыл­ды. Әлеуметтік желідегі парақшаларыңыздан сіздердің де бұл іс-ша­ра­лардан шет қал­ма­ған­дарыңызды көзі қа­рақ­ты көрермен көріп жүр. Ал ен­ді ойшылдардың шы­ғар­маларын насихаттау бары­сында атқарған басқа да жұмыстарыңызға тоқталсақ?
– Аудандық «Жастар ре­сурстық орталығы» КММ-нің ұйытқы болуымен жастардың бос уақытын тиімді пайдала­ну, оларға бағыт-бағдар беру, шы­ғармашылығын шыңдау мақ­­сатында түрлі форматта 70-ке жуық іс-шаралар ұйымдасты­рыл­ды. Сонымен қатар, жастар шы­ғармашылығын қолдау, оларды та­ныту мақсатында бірқатар онлайн мәдени іс-шаралар қолға алынды. Ау­дан жастары арасында ұлы ағартушы Абай Құнанбайұлының туылғанына 175 жыл толуына орай «Абай оқулары» атты онлайн байқау өтті. Сондай-ақ, әлеуметтік желі қолданушылары арасында бұл байқау өз жалғасын тапты. Жалпы қазақтың ғана емес, шығыстың ұлы ойшылы Әбу Насыр әл-Фарабидің туылғанына 1150 жыл толуына орай «Әлемнің екінші ұстазы» атты онлайн шығармалар байқауы ұйымдастырылды. Бұл байқауға аудан көлемінде қаламы жүй­рік жандар қатысып, өзара бақ сынасқан жайы бар. Ұлы тұлғаларымызды ұлықтау мақсатында жыл соңына дейін тағы да осы секілді дүниелерге қолғабыс етсек деген ниеттеміз.
– Айбек Сәрсеханұлы, әл-Фараби бабамыз заманында «Тәрбиесіз берілген білім адамзаттың қас жауы» деп айтқан еді. Бұл нақыл сөз өзінің өзектілігін әлі күнге дейін жоймай келеді. Осы орайда жастар ресурстық орталығы қызметкерлері жастарға дұрыс бағыт-бағдар беріп, өнеге көрсетеді деп сенеміз. Сұхбат барысында тұшымды пікір айтып, көңілге қонымды дү­ние­лермен бөліскеніңіз үшін сізге өз тарапымыздан алғыс білдіреміз.

Сұхбаттасқан Ахмет Қамшыбек.

 

Поделиться ссылкой: