ПАНДЕМИЯНЫҢ КЕСІРІНЕН ӘЛЕМ БОЙЫНША БАРЛЫҚ ОПЕРАЦИЯЛАР ОНЛАЙН ФОРМАТТА ОРЫНДАЛУДА. СОНЫҢ КЕСІРІНЕН БОЛУЫ КЕРЕК, СОҢҒЫ КЕЗДЕРІ ӘЛЕУМЕТТІК ЖЕЛІЛЕРДІ ЖЕТІ АТАСЫНДАЙ ТАНЫП АЛҒАН АЛАЯҚТАРДЫҢ САНЫ КҮН САНАП АРТЫП БАРАДЫ. МӘСЕЛЕН, ЖЫЛ БАСЫНАН БЕРІ АУДАНЫМЫЗДА ОСЫҒАН ҰҚСАС 7 БІРДЕЙ ФАКТІНІҢ
ТІРКЕЛУІ ЖОҒАРЫДАҒЫ СӨЗІМІЗГЕ АЙҚЫН ДӘЛЕЛ.
«Ардан безген алаяқтардың аяқ-қолына тұсау сала аламыз ба?» немесе «Олардың қылмыстық іс-әрекетін әшкере қылудың жолы қандай?» деген сауалдарды басты назарға алып, біз аудандық полиция бөлімінің бастығы Олжас Омарбековпен азды-кем тілдескен едік. «Расымен де, соңғы кездері ғаламтордағы алаяқтар өз қадамдарын алшаңдап басып жүрген жайы бар. Оған әсер еткен негізгі фактор – азаматтардың немқұрайлылығы әрі аңғалдығы. Мысалы, соңғы күндері қазақстандықтардың ұялы телефонына бейтаныс нөмірлерден қоңырау шалу фактілері жиілеп кеткен. Өзін банк қызметкері ретінде таныстырған ғаламтор серкелері әр түрлі нөмірлерден қоңырау шалады. Егер де сіз атаулы нөмірге өзіңіз қайта қоңырау шалсаңыз, алаяқтар әлеуметтік инженерияның дәстүрлі әдісін қолданады. Ол алдымен шоттар бойынша санкцияланбаған операциялар туралы хабарлайды. Ізінен клиенттерден құпия деректерді сұрап, шотыңыздағы ақшаны «қауіпсіз» жерге аудару керектігін айтады. Осыған әбден сендіреді. Мұндай жағдайда сөйлесуді бірден тоқтатып, бұл туралы банкке немесе құзырлы органдарға хабарлау қажет» – деген бөлім бастығы аудан тұрғындарын алаяқтардан барынша сақ болуға шақырды.
Құрметті оқырман! Есіңізде мына бір ескертпелерді мұқият сақтаңыз:
1) банк өкілдері сізден банк картасының 16 таңбалы нөмірін, картаның алдыңғы жағында орналасқан оның қолданылу мерзімін және картаның артқы жағындағы 3 таңбалы СVV/CVC кодын хабарлауды немесе жолдауды ешқашан сұрамайды;
2) ешбір жағдайда SMS-хабарлама арқылы келген кодтарды ешкімге жолдауға болмайды;
3) «банк қызметкерлерінің» және үшінші тұлғалардың талабы бойынша TeamViewer, AnyDesk және т.б. қосымшаларды телефондар мен компьютерлерге жүктемеңіз, көрсетілген қосымшалардың көмегімен алаяқтар сіздің құрылғыларыңызды толықтай бақылауға алып, шоттарыңыздан ақша жымқыруы әбден мүмкін.
Жәнібек БАЗЫЛБЕКОВ.
