ЖАСТАР ЖОЛДАУДЫ ТАЛҚЫЛАДЫ
308 Views
Сәрсенбі күні аудан әкімдігінің үлкен мәжіліс залында бәсірелі жиын өтті. Оған облыстық дін басқармасының басшысы Жангелді Омаров, аудан әкімінің орынбасары Әлібек Терлікбаев, аудандық жастар ресурстық орталығының директоры Айбек Сәрсеханұлы бастаған ұжым мен белсенді жастар қатысты.
Жиынның күн тәртібінде екі мәселе қаралды. Оның бірі – Президент Жолдауын жан-жақты талқылау болса, екіншісі – дін төңірегіндегі мәселелерге арналды.
Жиында алғашқы болып сөз алған басқарма басшысы Жангелді Омаров Президент Жолдауында айтылған мәселелерге толығымен тоқталып, оларға қатысты ойымен бөлісті. Бизнес бастауға, білім саласындағы жаңалықтарға ерекше көңіл бөлген Жангелді Жайлауұлы жастарды аянбай еңбек етуге шақырды. Ал екінші көтерілген мәселеде дін саласы бойынша сөз өрбіді. Атап айтар болсақ, діннің әлеуметтік желі арқылы насихатталуы сондай-ақ, «Жусан» операциясы жайында кеңінен мағлұмат берілді.
Жиын барысында жастар да белсенділік танытты. Басқарма басшысына сан түрлі сұрақтар қойып, сауалдарына тұшымды жауап алды.
Кездесуді қорытындылаған аудан әкімінің орынбасары Әлібек Терлікбаев «Біздің жастар қозғаушы күшке айналып, мемлекетті дамытуға барынша үлес қосуы керек. Сондықтан да бүгінгі жастар белсенді болғаны абзал. Егер де қандай да бір тың бастамаларыңыз болса, біз оны қолдауға әрдайым дайынбыз» деп бірлесе жұмыс істеуге шақырды.
Жәнібек БАЗЫЛБЕК.