Бұл өмірдегі ең қымбат нәрсе — көңіл
623 Views
Осы күндері өзіме көрсетіліп жүрген мемлекеттік жәрдем жөнінде көп ойланып, ол кісілердің атқарып жатқан істері жайында сөз қозғағым-ақ келіп жүргенді. Сәті түсіп бүгін, бұйырған күні қолыма қалам алып отырмын. Қайткенмен, қарттық жасыма налыған емеспін, кемпірім екеуміз әр күнімізге шүкіршілікпен қарап, қолымнан келгенше «Ата» деп сыйлаған әрбір жаннан ақ батамды аямаймын. Бүгін осындай көзге көріне бермес, қиындығы көп жұмысты еңсеріп жүрген «Т.Рысқұлов ауданы әкімдігінің жұмыспен қамту және әлеуметтік бағдарламалар бөлімі» КММ-нің қызметкері Көбеева Ұлжан Әбдіманапқызының жұмысы әңгімеме арқау болмақ. Өзін арнайы әлеуметтік қызмет көрсету орталығынан келгендігін айтып, амандығымызды білуге Уксинбай ата деп қол ұшын созып, аптасына бірнеше рет үй-жайыма жәрдемдесіп кетеді. Тірлікті былай қойып, Ұлжан қызымның хәл-жағдайымызды, көңіл-күйіміздің қалай екендігін, мазалап жүрген мәселелер болса тыңдауға дайын екендігін әр келгенінде сұрағаны жаныма жақын. Өз қызым келе жатқандай қуанып отырамын. Бұл өмірдегі ең қымбат нәрсе – көңіл. Әр келген сайын жұбайымыз екеуміздің көңіліміз ауланып, жадырап сала береміз. Әңгіме үстінде қажеттіліктеріміз бар жоғын түгендеп, қамқорлығы мен қызметін қоса атқаратын адал ниетті жанның бізге деген, «Уксинбай ата, Светлана апа» деген сыйластығын сағынып отырамыз. Сол Ұлжан қызымның арқасында біраз қарап тұрған тірлігім де бітіп, көңіліміз де жайланып, бір марқайып қаламыз. Мен ырза болғандықтан, тілеуін тілеп отырамын.
Жөн сұрай келе, көмек көрсетіп жүрген жандардың «Т.Рысқұлов ауданы әкімдігінің жұмыспен қамту және әлеуметтік бағдарламалар бөлімінің» КММ-де, үйде қызмет көрсету жағдайында арнаулы әлеуметтік қызмет көрсететін бөлімшеден келетіндігін білдім. Жан-жақты созылған қолдардан қысып ұстап, алға қарай қадамдар жасаған сәбидей мәз күйге бөленіп, көмектескен сайын қыздарыма деген, әлеуметтік қызметті ықыласпен атқарып жүрген жастарға деген құрметім арта түседі.
Осы тұста осы игі істі жүзеге асырып отырған «Т.Рысқұлов ауданы әкімдігінің жұмыспен қамту және әлеуметтік бағдарламалар бөлімі» КММ-нің басшысы Назарбеков Айхан Жамбылұлына алғыс айтқым келеді. Басшының төңірегіне жиналып, жұдырықтай бірлікте қызмет атқарып жүрген үйде қызмет көрсету жағдайында арнаулы әлеуметтік қызмет көрсету бөлімшесінің меңгерушісі Тілепбергенова Гүлмира Асимжанқызы, консультант Жұматаева Динара Нышынғалиқызы, әлеуметтік қызметтерге қажеттілікті бағалау және айқындау жөніндегі әлеуметтік қызметкері Қалиева Айнұр Тілеуғазықызы қыздарыма алғысым шексіздігін білдіре отырып, оларды игі жақсылар, сауапты істі жасаушылар деп білемін. Әсіресе, әр аптада келіп, хәлімді біліп, қамқорлығын танытып жүрген қызым Көбеева Ұлжан Әбдіманапқызына ерекше рақмет айтамын. Сонымен қатар, Луговой ауылы әкімдігінің бас маманы Абдикаримова Гүлжан Лайляқұлқызына ерекше алғысымды білдіремін. Осы қызымның арқасында осындай қызмет барын естідім. Ол өзінің өте білімді, еңбекқор, сонымен қатар, өз ісінің шебер маманы екендігін көрсете білді.
Осы орайда Ұлжан қызымды және әріптестерін «Әлеуметтік қызметкерлер» мерекесімен шын жүректен құттықтаймын! Көмекке мұқтаж жандарға қолдау көрсетіп, тер төгіп жүргендерің үшін шын көңілден шексіз ризашылығымызды білдіремін. Дендеріңе саулық, отбасыларыңа бақыт тілеймін. Жасап жүргендерің жақсы іс, елдің алғысын алып жүрсіңдер, қарақтарым! Сендердің жұмыстарыңа сәттілік тілеп, ақ бата беріп, жолдарыңның ашық болуына тілекшімін.
Алғыс білдірушілер: Беркімбаевтар отбасы.