«Сенім маршруты ҚҰЛАНҒА КЕЛІП ТОҚТАДЫ

268 Views

Әр адам өз құқығын тиісті деңгейде қорғай алуы тиіс. Дегенмен, қазіргі қоғамда өзгені былай алғанда өз құқығын қорғай алмайтын жандар да жетерлік. Осыны ескерген болуы керек, Мемлекет басшысы Қасым-Жомарт Тоқаев халыққа арнаған соңғы Жолдауында аталмыш салаға серпін беру керектігін айтып, жұмысты жүйелеу үшін нақты шараларды қабылдау маңызды екенін ескертті. Бүгінде бұл тапсырмаға сәйкес облыс аумағында тиісті жұмыстар өз деңгейінде атқарылуда. Соның бірі – «Сенім маршруты» жобасы.

Дәл қазір облыстық прокуратура қызметкерлері қолға алған бастама сәтті жүзеге асуда. Жоба аясында құрылған арнайы топ облыстың әр өңірінде болып, әкімдік өкілдерімен, кәсіпкерлермен, еңбеккерлермен және қарапайым ауыл тұрғындарымен кездесуде.

Апта басында ауданымызға жоғарыда атап өткен баста­­ма­ны іске асыру мақсатында облыс прокурорының орынбасары Әділ Кәрім бастаған топ ар­найы келді. Әділ Әбдіқадырұлы ең алдымен аудан әкімдігінің үлкен мәжіліс залында өткен жи­налысқа қатысып, аудан әкімі Ернар Есіркепов бастаған бірнеше сала басшыларының баян­дамаларына құлақ түрді.
Жалпы ауданда саяси ахуал тұрақты екен. Дейтұрғанмен, кезегін күтіп, күн тәртібінде тұрған өзекті мәселелер де бар­шылық. Соның салдары­нан аудан аумағында 21 ыстық нүкте картасы түзілген. Бірақ оған арқау болған маңызды мәселелер дереу бақылауға алынып, бірқатары оң ше­шіліпті. Бұл туралы жиында аудан әкімі Ернар Есіркепов баяндады. Сондай-ақ, Ернар Серікәліұлы өз баяндамасында дін, саяси тұрақтылық, этносаралық байланыс туралы сөз етті.
Аудан әкімінен кейін мін­берге аудан прокуроры Алмас Арыстанбеков, аудандық полиция бөлімінің басшысы Шалқар Дәулетқұлов, Ұлттық қауіп­сіздік комитетінің Т.Рысқұлов аудандық бөлімшесі бас­шы­­сының міндетін уақытша атқарушы Аслан Қожалиев шығып, өз салалары бойынша атқарыл­ған жұмыстарды жіпке тізді.
Жиын аяқтала салысымен-ақ облыс прокурорының орын­басары Әділ Кәрім аудан тұрғындарын жеке де қабылдады. Онда тұрғындар жердің жетіспеуі мен кәсіпкерлерді қорғау сынды мәселелерді қозғады. Сондай-ақ, Әділ Әбдіқадырұлы іссапар барысында Луговой ауылында орналасқан «Рельс дәнекерлеу» зауытының қызметкерлері­мен кездесіп, кәсіпорынның жұмысымен толық танысты. Сонымен қатар, облыс прокурорының орынбасары Жалпақсаз елдімекеніне арнайы барып, өткен жылы пайдалануға берілген теміржол өткелінің бүгінгі таңдағы жұмысымен танысып, ауыл тұрғындарын толғандырған сұрақтарға заң аясында жауап берді.

Жәнібек СҰЛТАН.

Поделиться ссылкой: