Ерболат Ибрайханов: қыстың қамын жазда ойлауымыз қажет
250 Views
Өткен аптада ауданға арнайы іссапармен облыс әкімінің орынбасары Ерболат Ибрайханов келді. Жұмыс сапары барысында облыс әкімінің орынбасары ең алдымен аудан аумағында орналасқан әлеуметтік-мәдени нысандардың отқазандықтарын тексеріп, жылыту маусымының барысын саралады.
Аралау жұмыстарынан кейін Ерболат Мақсұтханұлы аудан әкімі Ернар Серікәліұлымен бірлесіп, әкімдіктің үлкен мәжіліс залында Байзақ, Меркі және Т.Рысқұлов аудандарына қарасты жауапты сала басшыларының қатысуымен облыстық көшпелі штаб отырысын өткізді. Аталмыш штаб отырысында 2022-2023 жылдардағы жылыту маусымының өту барысы, кездескен кедергілер мен маңызды мәселелер қозғалды.
– Бүгінгі жиынның басты тақырыбы – жылыту маусымының жүргізілу барысы. Өздеріңізге белгілі, биыл қыс қатты суық болды. Дегенмен, біз алдымыздан шыққан қиындықтарды сәтті еңсере алдық. Алдағы уақытта мұндай оқыс оқиғалар мен төтенше жағдайларды болдырмас үшін қысқа дайындық жұмыстарын бүгіннен бастауымыз қажет. Бір сөзбен айтқанда, қыстың қамын жазда ойлағанымыз абзал. Сонда ғана біз алдағы қыстан аман-есен шығатын боламыз, – деп үш бірдей ауданның аталмыш салаға жауапты мамандарынан есеп алды.
Жиын барысында сала басшылары биыл кейбір оқу ұйымдарына қатты отынның жеткізілу процесі қиындық туғызғанын айтты. Жауаптылар аталмыш мәселелерді облыс деңгейінде шешіп беруді өтінді. Сондай-ақ, бөлім басшылары тарапынан қазандықтарды көгілдір отынға ауыстыру, қосалқы жылытқыштарды ретке келтіру сынды мәселелер де облыс әкімі орынбасарының назарына ұсынылды.
Жиын қорытындысы бойынша аталған мәселелер хаттамаға тіркеліп, назарға алынды.
Жәнібек СҰЛТАН.