Ақыл көпке жеткізер, өнер көкке жеткізер

238 Views

Біз М.Х.Дулати атындағы Тараз өңірлік университетінің «Гуманитарлық -әлеуметтік ғылымдар» факультеті конвергентті журналистика мамандығының студенттеріміз. Биыл алғаш рет газеттен өндірістік іс-тәжірибеден өтіп отырмыз.

Оқушы кезімізде «газет шығару ісі оңай» деп ойлайтынбыз. Олай емес екен. Оны редакцияға келіп, әңгімелескен соң ғана білдік. Жай біліп қана қойған жоқпыз, сол күні берілген тапсырманы айтсаңызшы. Біз абдырап қалдық. Өндірістік іс-тәжірибе жетекшімізге ләм-мим дей алмадық. Іштей тындық. Сөйттік те Көкдөнен ауылына жол тарттық.
Барғанымыз қандай жақсы болған. Керемет көріністің куәсі болдық. Қасымдағы Мадина құрбым екеуіміз бір-бірімізге қарап қоямыз. Ол да маған қарап:
– Дариға, қандай ғажап көрініс!,– деп таңданысын білдірді. Мектеп оқып жүрген кезде талай концерттік іс-шараларды көргенбіз. Мына іс-шара енді нағыз кәсіби мамандардың атсалысуымен өрбігені көрініп тұр. Мұнда, яғни біз бар­ған Көкдөнен ауылдық мәде­ниет үйінде ауданымыз­дың құрылғанына 85 жыл толуына орай «Ауылым – алтын тұғырым» атты іс-шара ұйым­дастырылған екен. Осылайша біздер аудандық мәдениет үйінің қызметкерлері қолдап, Қорағаты, Ақбұлақ, Құмарық, Қызылшаруа және Көкдөнен ауылдарының мәдениет үйі жетекшілерінің ұйымдастыруымен өткен ілкімді шараның куәсі болдық.
Біз атаған мәдениет үйінің жетекшілері іс-шараның өткізілуіне тыңғылықты дайындалыпты. Қазақы танымдағы салт-дәстүрдің ерекше үлгілері көрініс арқылы көрсетілді. Аталмыш іс-шараға аудандық ардагерлер Кеңесінің төрағасы Қожайхан Бижанов, аудандық мәслихаттың депутаты Ердос Сақпанқұлов, ауыл ақсақалы Ораз Үкібаев, «Құлан-Дән» несие серіктестігі басқармасының директоры Рахманәлі Әбдіқадіров пен аудандық мәдениет және тілдерді дамы­ту бөлімінің басшы­сы Рүстем Қырықбаев қаты­сып, сөз сөйлеп, ақжар­ма тілек­терін білдірді.
Содан соң келген қонақтар ауылдық мәдениет үйінің ішіне енді. Концерт көруге. Біз де залдағы орындықтардың біріне жайғастық. Іште тулап жатқан бұлқыныс сезімімізді сөзбен айтып жеткізе алмаймыз.
Концертте би билеген «Іңкәр» би тобының аруларына тамсандық. Іс-шара Көкдөненде өтіп жатқандықтан, даңқты композитор Мэлс Өзбековтің әні басқаны былай қойғанда, Көкдөненнің мәдени сахнасында шырқалуы заңдылық деп білеміз. Мэлс ағамыздың «Келші Құланға» әні концертте орындалды. Оны шырқаған Құмарық ауылының өнерпазы – Жанболат Байсейітов. Ауданымыз Тұрардай тау тұлғаның есім-сойымен аталғандықтан, дәл осы іс-шарада Тұрар Рысқұловтың өмірі жайлы қойылған көрініс тіпті тамаша болды. Қорағаты ауылдық мәдениет үйінің үйірме жетекшісі Айгүл Жұмабайдың орындауындағы композитор Ескендір Хасанғалиевтің «Айналдым елім» әнін жұрт ықылас­пен тыңдады. «Ауылым әнім» әнін шырқа­ған Жансұлу Спан­ның да өнері көптің көңілінен шықты деп ойлаймыз. Содан соң ән салған дәстүр­лі әнші Гүлнәзия Пірімқұлованың, ауылдық мәде­ниет үйі қызмет­керлерінен құрал­ған фольклордың, «Еркежан» би тобы қыздарының көрсет­кен өнер­леріне көкдөнендіктер ерекше қошемет көрсетті. Концерт соңы есті әндерімен елдің есінде қалған Ескендір ағамыздың «Атамекен» әнімен қорытындыланды.

Дариға Сейлібайқызы,
Мадина Мұсабай.
М.Х.Дулати атындағы Тараз өңірлік университетінің «Гуманитарлық -әлеуметтік ғылымдар» факультеті конвергентті журналистика мамандығының 1 курс студенттері.

Поделиться ссылкой: