Хикмет жаттаған АРАЙЛЫМ
148 Views
Арайлым Мейрамханқызы Шоқан Уәлиханов атындағы шағын орталықты орта мектептің 10 сыныбында оқиды. Арайлым өте білімді оқушы. Білімді дейтін себебіміз, ол Қожа Ахмет Яссауидің көптеген хикметін жатқа біледі. Хикмет жаттау екінің бірінің қолынан келе де бермейді. Біз тек Арайлымның бір қырын ғана жазып отырмыз. Одан бөлек қаншама ақын-жазушылардың өлеңдерін де жатқа айтады Арайлым. Оны біз өз көзімізбен де көрген едік.
Осыдан бірер ай бұрын Яссауитану байқауының аудандық кезеңі өткен болатын. Осы байқауда Қожа Ахмет Яссауидің хикметтерін жатқа айтуда Арайлымның алдына түсетін оқушы табылмаған еді. Ол дәл осы байқауда топ жарып, облысқа жолдама ұтып алған еді. Кейіннен облыста да өзінің даралығын дәлелдеп, үздік атанды. Яғни облыстық кезеңде де жүлделі І орын иеленді.
Осы жақын күндері Яссауитану байқауының республикалық кезеңі Түркістан қаласында өтті. Оған әр өңірден іріктелген білімді оқушылар қатысты. Аталмыш байқаудың республикалық кезеңінде де Арайлым өзінің мықтылығын тағы да дәлелдей білді. Осылайша Шоқан Уәлиханов атындағы шағын орталықты орта мектептің қазақ тілі мен әдебиеті пәнінің мұғалімі Күлсін Исаевадан тәлім алатын Арайлым Мейрамханқызы Түркістанда өткен бәсі жоғары байқауда І дәрежелі Мақтау қағазымен марапатталды.
Арайлым алдағы уақытта Талдықорғанда өтетін «Ілияс оқулары» байқауының республикалық кезеңінде де бақ сынайтын болады. Осы байқауда да Арайлымға сәттілік серік болып, жеңімпаз атануына тілекшіміз.
Марат Диханбай.