Біздің елдің жігіттері – жігіттердің төресі!
187 Views
Жуырда Пәкістан мемлекетінде «International Pakistan Army Team Spirit Competition – 2024» деп аталатын Халықаралық жаттығу өтті.
60 сағаттық жаттығудың мақсаты – күрделі халықаралық қауіпсіздік жағдайында әскери ынтымақтастықты арттыру болды. Жарыс Пәкістанның астанасы Исламабад маңындағы ежелгі Равалпинди қаласында өтті.
Халықаралық шараға 22 мемлекет қатысты. Негізгі қатысушылар: Қазақстан, Пәкістан, Бахрейн, Иордания, Сауд Арабиясы, Мальдив аралдары, Марокко, Катар, Шри-Ланка, Таиланд, Түркия, Америка Құрама Штаттары, Өзбекстан және т.б. Бұл жаттығу Пәкістанда жыл сайын ұйымдастырылады. «Пәкістан армиясының командалық рухы – 2024» халықаралық жарысы 2016 жылдан бастап, тұрақты түрде өткізіліп келеді. Биыл қазақстандық әскери қызметшілер үшінші рет қатысып отыр. Жаттығу күрделі миссияларды орындау кезінде әртүрлі жағдайларда жылдам шешім қабылдау үшін физикалық дайындықтың, ақыл-ой ептілігінің және кәсіби әскери тәжірибенің жоғары стандартын талап етеді. Әскери-спорттық турнирдің кезеңдеріне мыналар кірді: қарсыластың нысандарын анықтау, тосқауылдағы іс-қимыл, артиллерия атысын реттеу, жедел медициналық көмек көрсету және жаралыларды эвакуациялау, учаскені минадан тазарту, түнде су бөгеттерін еңсеру және Калашников автоматынан ату.
Осы аталған әлемдік жаттығу жарысына Қазақстан атынан барып, біздің жерлестеріміз Луговой гарнизоны 03811 әскери бөлімі оза шауып, жүлделі І орынды иеленді. Олардың қатарында: Оңтүстік өңірлік қолбасшылығының барлау бастығы, подполковник Ербол Серғазин, подполковник Абзал Әділханұлы, майор Ұлан Уәлиханұлы, капитан Жандос Бекжанұлы, 3-ші сынып сержанты Асхат Нұраханұлы, 3-ші сынып сержанты Нұржігіт Исмайл, аға сержант Дәулет Мәдениетұлы, 3-ші сынып сержанты Ержан Бейбітұлы, ефрейтор Ержан Салифұлы, ефрейтор Серік Ынтықбай, ефрейтор Дәулет Ғайниұлы болды.
– Мықты дене шынықтыру жаттығулары, іс-қимыл үйлесімділігі, шыдамдылық пен командалық рухы – біздің жауынгерлеріміздің сәтті өнер көрсетуінің кепілі болды. Біздің психологиялық дайындығымыз бен қаншалықты шымыр екенімізді ұрысқа барынша жақындатылған жағдайда күрделі әрі бейтаныс жерде сынап көруге тамаша мүмкіндік туды. Ең бастысы – жақсы тәжірибе алдық, – деп қорытындылады команданың жетекшісі, подполковник Ербол Серғазин.
Е.Төренов,
03811 әскери бөлімінің аэромобильді ротасының аға маман-барлаушысы, ефрейтор.