Жастар – елдің тірегі, үкілі үміті

Еліміздің ұйытқысы – жалын­даған жастар. Олар мемлекеттің қоз­ғаушы күші ғана емес, өзегі. Бұл жайында ұлт ұстазы Ахмет Байтұрсынұлының өзі: «Ұлтын керек қылып, халыққа қызмет қыла­мын деген қазақ балалары қазақ жұмы­сына қолынан келгенше қарап тұрмай кірісіп істей берсе, ұлт жұ­мысы ұлғайып, толықпақшы» – деп жастардың ұлт үшін маңызды рөл атқаратынын жоғары бағалап жазып кеткен.
Осындай үміт артатын жастары­мыздың бірі – Абидин Қанат Шолпанұлы. Ол 1994 жылы дүниеге келген. Физика мамандығы бойынша білім алып, 2022 жылы 27 жасында доктор атанған жас ғалым. Өз білімі мен талабының арқасында осындай дәрежеге жете білген Қанат бауырымыз бүгінде ата-анасының қасында. Қазіргі таңда М.Х. Дулати атындағы Тараз өңірлік универ­ситетінде физика пәні бойынша білім­герлерге дәріс беруде. «Ел тірегі, үкілі үміті – жастар» дегендей, туған жерінде қалып, бойындағы бар білімін елі үшін аянбай еңбек етуші жастарымыздың барын мақтан тұтамыз.
Бұған дейін де ауылымыздан шыққан жас ғалым, өнер жұлдыздары аз емес. Жылдан-жылға осындай жақсы жаңалықтарымызбен бөлісе беруді нәсіп етсін. Қанат сынды халыққа қызмет ететін жастарымыздың қатары толыға берсін.
Осы сөзімізді кейінгі жас буынның көргені не болады, біздің жұрт осыны ойлау керек деп уайымдаған Міржақып Дулатұлының пікірімен қуаттай түссек артық етпес. Алаш зиялысы: «Жас балалар келешектегі бір буын халық» деген келер ұрпаққа өсиет сөз қалдырған.
Саналы ұрпақ – еліміздің бола­шағы, ертеңі. Тәуелсіз еліміз бола­шаққа қарыштап қанат жайғанда, халқымыздың мәдениеті кемел­денген кезеңде тек білімді жастар ғана ұлтымызды асқақтатып, мем­ле­кетімізді даңқты етері сөзсіз. Қазақстанның жарқын болашағы жалындаған жастармен ғана қалып­таспақ!

Н.Сәрсенбаева,
«Жастар ресурстық орталығы» КММ-нің Ақыртөбе ауылдық округі бойынша жастар ісі жөніндегі инспекторы.

Поделиться ссылкой: