Қазақ халқы Сағадат Қожахметұлы Нұрмағанбетовтің есімін жақсы біледі. Ол туралы материалдар газет беттерінде сан мәрте жарық көрді. Бізде қазақтың маңдайына біткен ерен ердің өмірбаяны мен елеулі істері туралы ой қозғағанды өзімізге парыз санадық.
Сағадат Нұрмағанбетов 1924 жылы 25 мамырда Ақмола облысы, Ақкөл ауданы, Еңбек ауылында дүниеге келген. Ұлы Отан соғысына қатысқан. 1942 жылы әскер қатарына шақыртылған. 1946 жылы әскери академияны, 1981 жылы Бас штаб акамедиясын бітірген. 1950-1989 жылдары – азаматтық қорғаныс штабының бастығы, Орта Азия әскери округі әскерлер бастығының орынбасары, Оңтүстік әскер тобы (Венгрия) бастығының бірінші орынбасары. 1990 жылы ҚР соғыс, еңбек және Қарулы күштері ардагерлері Кеңесінің төрағасы, 1991-1992 жылдары КСР Мемлекеттік қорғаныс комитетінің төрағасы. 1992-1995 жылдары ҚР қорғаныс министрі, армия генералы, 1996 жылы ҚР Президентінің кеңесшісі болды. Ол КСРО, Ресей, Украина басқа да мемлекеттердің түрлі сипаттағы ордендерімен марапатталған.
Тұғырлы тұлғаның жауынгерлік жолын жас ұрпаққа насихаттау мақсатында Қазақстан Республикасы Қорғаныс министрлігі ӘҚК ӘӘК 64207 әскери бөлімінің командирі, подполковник Ж.Байбосыновтың жетекшілігімен 27 мамыр күні Ұлы Отан соғысының ардагері, Кеңес одағының батыры, Халық қаһарманы, Тәуелсіз Қазақстанның тұңғыш Қорғаныс министрі, армия генералы Сағадат Қожахметұлы Нұрмағанбетовтің 100 жылдығына орай тәрбие сағаты өткізілді. Тәрбие сағатында ұлт мақтанышы Сағадат Нұрмағанбетовтың өмірбаяны, сіңірген еңбегі, оның тәуелсіз Қазақстанның Қарулы күштерін құруға және дамытуға қосқан үлесін бағалау және насихаттау негізінде жастарға әскери патриоттық тәрбие беру мақсатында ұйымдастырылды.
Сағадат Нұрмағанбетов өскелең ұрпағымызбен ұландарымызға үлгі боларлық тарихи тұлға.
А.Тилеубергенова,
64207 әскери бөлімінің штаттан тыс мемлекеттік тілді дамыту жөніндегі маманы.
