Астана – бейбітшілік пен ынтымақ мекені

25 Views

Әр елдің астанасы – сол елдің төлқұжаты. Қандай да бір ел туралы білгіміз келсе, алдымен сол елдің астанасы туралы алғашқы ақпаратты аламыз. Қазақ елінің астанасы туралы сөз ететін болсақ, онда астана мәртебесіне ие болған Орынбор, Қызылорда, Алматы туралы да деректер бой көтереді. Алайда сөз жас қала – Астана, тәуелсіздіктің туындысы туралы болмақ. 1992 жылы ел астанасы Ақмола қаласына көшіріліп, кейінірек қала Астана атауына ие болды. Еліміздің жаңа келбетін танытып, тарихтың тарлан беттерін ашып, сан ғасыр армандаған тәуелсіздіктің нық тұғыры болып танылды. Тәуелсіздік тұғырын танытатын тарихи және мемлекеттік мәртебе айтылған сөзбен, берген бағамен беки қалмасы анық. Астанамыздың тарихи баға алу негіздері қандай? Қандай дәлелдермен дәйектеуге болады? Халқымыздың тарихында сәні мен салтанаты талайды тамсандырған Сауран, Отырар, Сарайшық, Алмалы тағы басқа қалалар болғаны туралы деректер баршылық. Алайда жас Астананың әлемдік деңгейде танылу себебі неде? Тақырыпты ашу мақсатында осы сұрақтарға жауап беріп көрейік. Астана мәртебесін тұғырлы етуі – Елбасымыздың көрегендігі мен оның ойшыл Ұлт Көшбасшысы екенінің даусыз дәлелі. Арнайы бағдарламалар мен стратегиялық жоспарлар іскер басшылықпен жүзеге асырылды, жас қаланың географиялық ерекшелігі, сәулет, экономикалық, демографиялық, әлеуметтік және тағы басқа мәселелері мерзімінде шешімін тапты. Қазіргі Астана – білім мен ғылым ордасы, экономикалық даму орталығы, сәулетті мекен. Астана – Ақордадан алаштың ақпаратын әлемге таратқан қасиетті мекен. Өзіне тән тарихын танытар нышаны – Бәйтерек. Оның биіктігі – 97 метр, аумағы – 22 метр. Металл құрылғы биіктігі – 105 метр. Ол жерге қадалған 500 қадаға орнатылған. Елдік пен өрліктің образын сомдайтын алып Бәйтерек монументі ғасырлардың сырын түйіп, қазақ даласының бүгінгі үнін танытып тұр. Сұңғыла жан сырын көкірек көзімен түйсінеді. Бұл – уақытпен тайталасқан пирамидалармен иық таластырар тарихи жәдігер. 300 тонналық «Бәйтерек» шарын 2017 жылдан бастап қолдануға берілген ЭКСПО шары толықтыра түсті. Елімізде өткен тарихи оқиғаның куәгері, батыл ойлар мен бақытты болашақ музейі – Нұр Әлем. Енді бұл кешенде болашаққа соқпақ салар, тың идеялар жүзеге асырыла бастады. Соның бірі – Халықаралық Қаржы орталығы. Ол – жаңа ғасыр үні, тәуелсіз елдің бекем болашағы мен өркениет келбеті. Астана – қайсар халықтың сипатын бойына жинаған Елорда. Тұғыры тереңде, ол – ғұндар салған батыс қамалмен, Ұлы Жібек Жолындағы қорған қала Бозақпен тілдескен тарихи жәдігер. Еуразия еркесі, ару Астана – бейбітшілік пен ынтымақ ордасы, қазығы берік тұғыр. Ал бірлік бар жерде көркею мен даму бар.

Мадина Мұсабай.

Поделиться ссылкой:

Добавить комментарий