Ақпан айының бірінші бейсенбісі – Дүниежүзілік сайлау күні. Осыған орай, аудан аумағында бірқатар іс-шаралар легі ұйымдастырылды. Оны газеттің осы санынан оқи аласыздар.
2025 жылғы 5 ақпанда Дүниежүзілік сайлау күніне орай аудан әкімдігінің ішкі саясат бөлімінің «Жастар ресурстық орталығы» КММ-сі мен Т.Рысқұлов аудандық аумақтық сайлау комиссиясының ұйымдастыруымен аудандық Мэлс Өзбеков атындағы мәдениет үйінде аталған ұжымның қызметкерлері мен аудандағы белсенді жастармен арнайы кездесу өтті.
Аталған кездесуге аудан әкімінің орынбасары, мүдделі мемлекеттік органдардың басшылары, аудандық мәслихат депутаттары, ардагерлер кеңесінің төрағасы, саяси партия мен БАҚ өкілдері және аудандық аумақтық сайлау комиссиясының мүшелері қатысты. Кездесу барысында комиссия төрағасы М.Тлепов «Қазақстан Республикасының сайлау жүйесіндегі реформалар» туралы баяндама жасады.
Аталған кездесуде комиссия төрағасының орынбасары Н.Көпбаев «Қазақстан Республикасының сайлау жүйесі» тақырыбында баяндап өтті.
Сонымен қатар аудандық мәслихат депутаты М.Мейманханов та сөз сөйлеп, сайлау халықтың билікке деген сенімінің және азаматтық қоғам деңгейінің көрсеткіші екендігін тілге тиек етті. Сондай-ақ, ол өз сөзінде еліміздегі сайлау өткізу әдісі қоғам сұранысына сай бейімделіп жатқанын, ендігі кезекте сайлаушылардың белсенділігін, сайлау мәдениетін арттыру бағытындағы жұмыстарға басымдық беру қажеттігін атап өтті.
Кездесуді қорытындылай келе, комиссия төрағасы М.Тлепов қатысушыларға Дүниежүзілік сайлау күнінің шығу тарихы мен мәні туралы егжей-тегжейлі түсіндірді. Жастар тарапынан қойылған сұрақтарға қолданыстағы заң талаптары негізінде тиісті жауаптарын берді. Кеше бекітілген жоспарға сәйкес дәл осы мазмұндағы іс-шаралар тізбегі Абай орта мектебінде және Құлан агротехникалық жоғары колледжінде де өтті.
М.Тлепов,
Т.Рысқұлов аудандық аумақтық сайлау комиссиясының төрағасы.
