Еркебұланның шәкірттері жарап тұр

Еркебұланның шәкірттері жарап тұр

Жақында Шымкент қаласында жасөспірімдер арасында еркін күрестен «Дружба народов» атты халықаралық жарыс өтті. Шымкент шаһарында ұйымдастырылған халықаралық сайыста Жақсылық ауылының жасөспірім қарадо­малақтарын еркін күреске баулып жүрген білікті жаттықтырушы Ерке­бұлан Батырхановтың да шәкірт­тері бақ сынады.
Жаттықтырушы Еркебұлан Батыр­хановтың табандылығы мен еселі еңбегін біз бұған дейін де газетімізде жазғанбыз. Қазір білікті жаттықтырушылардың көбісі қалада жұ­мыс істегісі келеді. Өйткені қала­да айлық жалақы мәселесі ауыл­ға қарағанда едәуір көп. Білікті бап­керлер ауылдан гөрі қалада еңбек ет­­кісі келетіні сондықтан.Тәп-тәуір қалада жұмыс жасап жүрген жері­­нен өзі туып өскен Жақсылық ауылына жаттықтырушы болып келген Еркебұланның тәуекелшілігін осы арада атап өтуге тиіспіз. 2023 жылдан бері Жақсылық ауылындағы жасөспірім жеткіншектерді олимпиадалық спорт түріне кіретін еркін күреске баулып жүрген Еркебұлан Батырхановтың шәкірттері осы аралықта көптеген жарыстарда жүлделі болып үлгерді. Шымкенттегі халықаралық жарыстан да оның шәкірттері құр алақан қайтқан жоқ. Атап айтсақ, Нұршах Өмірбек 35 келі салмақ дәрежесінде белдесіп, жүлделі II орын иеленді. Осы халықаралық жарыста 29 келіде белдескен Нұрасыл Жолдас пен 45 келіде сынға түскен Даниял Қажымұқан да жүлделі III орынға ие болып, үздік үш балуанның қатарынан көрінді. Алдағы уақытта да талай жарыстарда Еркебұланның шәкірттері биік белестерді бағын­дырады деп сенеміз. 

Ұлттық ойындарда олжасыз қалған жоқ

Жуырда Тараз қаласында өткен облыстық «Ұлттық мектеп лигасы» жарысында асық атудан №6 мектеп-гимназиясының 7-8 сынып оқушылары жүлделі ІІІ орынға ие болды. Жетекшілері – асық ату спортынан талай шәкірт баптап, аламанға қосқан білікті жаттықтырушы Ескендір Тегешов пен Ғазиз Өмірқұл. Жаһандану заманында ұлттық спортқа ден қойып, баба аманатын жалғастырып жүрген оқушыларымызды айтулы жеңістерімен құттықтаймыз.
Сондай-ақ, жақында қыздар арасында «Ұлттық мектеп лигасы» жарысының бағдарламасына енетін бес асық және шекемтас ойындарынан да Ақыртөбе орта мектебінің 5-6, 7-8, 9-11 сынып оқушылары жүлделі І орынды иеленіп, республикалық жарысқа жолдама еншілеп алды.
Ақыртөбе орта мектебінің оқушы қыздарын бес асық пен шекемтас ойындарына баулып жүрген ардагер ұстаз Молдақасым Қайынбердиев пен Тұрғын Рахметілдаев екенін айта кетейік.
Соңғы жылдары елімізде ұлттық спорт түрлеріне айрықша көңіл бөлінуде. Соның айқын дәлелі ретінде осы «Ұлттық мектеп лигасы» бағдарламасына енетін біз жазған спорт түрлерін айтсақ болады. Ақыртөбелік оқушы қыздарымыз да республикалық додада ауданымыздың мерейін үстем етеріне сенеміз.

Топтаманы дайындаған Марат Диханбай.

Поделиться ссылкой: