Орманды қорғау оның басты миссиясы
121 Views
Орманшы – табиғатты қорғап, ормандардың дамуына үлес қосатын ерекше маман. Олардың өмір жолы – табиғатқа адал қызметтің, жауапкершіліктің және еңбектің символы.
Табиғатқа жанашырлық – жүректен басталады. Оны өмірлік міндетіне айналдырып, орман мен жануарлар дүниесін қорғауға бар ғұмырын арнаған жандардың бірі – Керімжан Әбдуғапарұлы. Ол осы салада 32 жыл бойы адал еңбек етіп келеді. Сондай-ақ, ол табиғатты қорғаудағы еңбегі мен қажыр-қайраты үшін «Облысқа сіңірген еңбегі үшін» және «Еңбек даңқы» медальдарымен марапатталған.
Айта кету керек, қазіргі таңда Луговой ормандарды және жануарлар дүниесін қорғау жөніндегі мекемеде 79 адам қызмет атқарып келеді.
– 1993 жылы «Луговой ормандарды қорғау және жануарлар дүниесін қорғау жөніндегі мекемесіне» механизатор болып жұмысқа кірдім. Негізгі мамандығым – механизатор. Осы орман шаруашылығында 32 жыл қызмет етіп келемін. Орманшы қызметіне ауысқаныма 3 жыл болды. Ең алдымен орманшы болу үшін табиғатты сүю керек. Сонымен бірге еңбекқорлық, шыдамдылық қасиеті де керек. Күнделікті жұмысым орманды қорғау. Өзіме бекітілген орманды аралап, көктем мезгілінде ағаш отырғызып, оны күтіп қараймын. Өрт болмас үшін тазалыққа қараймын. Заңсыз ағаштарды кескен адамдарға хаттама жазамын. Жастарға айтарым, табиғатты қорғап, ағаш отырғызуды әдетке айналдыру керек, – дейді Керімжан Әбдуғапарұлы.
А. Мұратбетқызы.