Әжелер шеберлік сағатын өткізді

Жамбыл өңірінде ақ жаулықты әжелер­дің «Ақ әжемнің ертегілері» жо­ба­сын сәтті ұйымдастырып жат­қанынан баршамыз хабардармыз.

Аталмыш жобаның жаңа деңгейі – сол ертегілерді оқытудың әдіс тәсілдері бойынша аудан ішілік шеберлік сағаты ұйымдастырылды. Ол жақында ғана «Балдырған» бөбекжай-бақша­сында «Ертегі – балалар бола­шағымның ертеңі» тақырыбымен өтті. Аудандық аналар кеңесінің төрайымы Түзел Селбайқызының ұйытқы болуымен іс-шараға аудандық ардагерлер Кеңесі­нің төрағасы Қожайхан Бижанов, ассамблея директоры Серік Өтегенов, білім бөлімінің бас маманы Назым Садықбекова, Ш.Мұртаза атындағы Руханият және тарихтану орталығының мәдени ұйымдастырушысы Гүлгаухар Бүркітбаева және ауданның ардақты аналары қонақ болып қатысып, шеберлік сағатында өз ойларын ортаға салды. Іс-шараның басы балабақша тәрбиешілері дайындаған сахналық көрініспен басталды. Онда кішкентай бүлдіршіндер қазақтың ұлттық аспаптарынан құралған оркестрдің рөлінде қазақы салтанатты киіммен ұлттық аспаптарды қолдарына алып,«Ата толғау» күйін тыңдады. Қазақ күйлерін бала кезден құлағына сіңіріп өскен бүлдіршіндер бүгінде бірнешеуін танып-білген жайы бар. Одан кейін «Қарлығаштың құйрығы неге айыр», «Жеті лақ» ертегілері жаңа форматта сахналанды. Онда үлкен топтың балалары мен тәрбиешілері барынша үйлесіммен әр қимыл мен әрекетті сахналап, тыңдаушысын қызықтыруға тырысты. Сондай-ақ, шеберлік сағатына арнайы дайын­далған «Ертегі – рухани қазына» көр­месі де келген қонақтар назарына та­ныстырылды.

Бақыт Мырзалиева,
аудандық аналар кеңесінің мүшесі.

Поделиться ссылкой: