«Болашаққа бағдар» — Құланда
776 Views
Бүгінгі таңда ел жастарына қатысты бірнеше өзекті мәселелер бар. Дәлірек айтар болсақ, жастардың жұмыссыз жүруі, жатақхана және баспанамен қамтамасыз етілуі, жас кәсіпкерлердің түрлі бағыттағы мемлекеттік қолдау тетіктерін білмеуі, жастар арасындағы құқықбұзушылықтың жиілеуі солардың қатарына жатады. Осы түйткілді мәселелерді шешу бағытында облыс басшылары арнайы жобаны қолға алып, бүгінде іске асырып үлгерді. Аталмыш жобаның атауы – «Болашаққа бағдар» деп аталады. Бағдарламаның негізгі мақсаты – облыс көлеміндегі әрбір ауыл, елдімекендердегі жастардың түрлі санаттарын барынша қамтып, оларға қатысты мәселелерді жергілікті жерлерде кең ауқымда көтеріп, нақты шешуге бағытталған. Сонымен қатар ұйымдастырушылар облыс тұрғындарының сыбайлас жемқорлыққа қарсы мінез-құлық үлгісін одан әрі дамытып, жемқорлық мәселесін барынша шешуді басты назарға алып отыр.
Апта басында ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Жамбыл облысы бойынша департаменті, облыс әкімдігінің білім, кәсіпкерлік және индустриалды-инновациялық дамыту, жұмыспен қамтуды үйлестіру және әлеуметтік бағдарламалар, ауыл шаруашылығы, Еңбек инспекциясы, экономика және бюджетті жоспарлау, дін істері, жер қатынастары басқармалары мен аудандық салалық бөлімдер, облыс бойынша Қылмыстық атқару жүйесі департаментінің Пробация қызметі, «Жас Отан» жастар қанаты, кәсіпкерлер палатасы, «Даму» қоры, жоғары және орта арнаулы оқу орындарының өкілдері мінген автокөлік аудан орталығында орналасқан Мэлс Өзбеков атындағы мәдениет үйіне келіп аялдады. Ізінен көшпелі кеңестің мобильді топ құрамы мәдениет үйінде ұйымдастырылған салтанатты жиынға қатысты. Аталмыш жиында аудан әкімінің орынбасары Бейсенбек Әлпейісов сөз сөйлеп, шараны ашып берді. Сонымен қатар, Мемлекеттік қызмет істері және сыбайлас жемқорлыққа қарсы іс-қимыл агенттігінің Жамбыл облысы бойынша департаментінің басқарма басшысы Ермек Тумабеков, Сыбайлас жемқорлыққа қарсы ұлттық бюросының Жамбыл облысы бойынша департамент басшысының орынбасары Нүркен Исламов, Сыбайлас жемқорлыққа қарсы ұлттық бюросының Жамбыл облысы бойынша департаментінің штаб басшысы Ғани Тубаевтар тұрғындарды белсенділік танытуға шақырды.
Жиын аяқтала салысымен тұрғындар мәдениет ошағының дәлізінде отырған мамандардан ақпарат алып, жеке дара тілдесе бастады. Әсіресе, «Тұрғын үй жинақ банкінің» маманы Рахима Өскенбаеваның алдындағы кезекте тұрған көп балалы аналардың көптеп жиылғанын көзіміз шалып қалды. Рахима Әмзеқызы көп балалы аналардың көкейіндегі сұрақтарға жауап беріп, қазіргі қолданыстағы «7-20-25», «Нұрлы жер», «Бақытты отбасы» сынды үй алуға арналған бағдарламаларды таныстырды. Бағдарламалардың пайыздық мөлшерлемелерін, несиені өтеу және алғашқы жарнаны жинақтау тәртібін толықтай түсіндірді.
Дәл осы мезетте мәдениет үйінің екінші қабатында орналасқан «Рухани жаңғыру» жобалық офисінде Сыбайлас жемқорлыққа қарсы ұлттық бюросының Жамбыл облысы бойынша департамент басшысының орынбасары Нүркен Исламов аудандағы дін саласының өкілдерімен кездесті. Ауылдық мешіттердің имандарымен пікірлесіп, бірқатар мәселелерді ортаға салды. Одан бөлек жиын барысында осы күнге дейін дін саласы бойынша атқарылған жұмыстар сараланып, тиісті сала басшыларына тапсырмалар берілді.
Облыстан келген департамент басшылары аудандағы білім саласының жұмыстарымен де танысып, Құлан агротехникалық колледжінің білімгерлерімен кездесті. Колледж қабырғасында болған жиында студенттермен тілдесіп, жатақхана, білім саласындағы жомқорлық фактілерін болдырмау бойынша сөз қозғап, еркін форматта пікір алмасты.
Сыбайлас жемқорлыққа қарсы ұлттық бюросының Жамбыл облысы бойынша департаментінің штаб басшылары аудан әкімдігінің үлкен мәжіліс залында актив жиналысын өткізіп, мемлекеттік қызметкерлемен де кездесті. Мемлекеттік қызметкерлермен қатар жиынға белгіленген үш ауылдық округ әкімдері, аудандық білім беру басқармасының әдіскерлері мен бөлім басшылары осы уақытқа дейін көтеріліп, шешімі табылмай келе жатқан мәселелер жайында сөз етті. Мәселен, кездесу барысында аудан әкімінің орынбасары Б.Әлпейсіов бір ғана Құлан ауылының өзінде 2019 жылға 1500 жер телімін беру жоспарланып отырғанын айтып, кезекке 2009 жылдары тұрған тұрғындарға жер телімдері берілетіндігі жайында мәлімдеді. Сыбайлас жемқорлыққа қарсы ұлттық бюроның штаб басшылары аталған мәліметтің қуантарлық жайт екенін алға тартып, Тараз қаласында әлі күнге дейін 2005 жылы кезекке тұрған азаматтардың жер ала алмай жүргендігін жеткізді. Кездесу барысында ветеринария саласына бөлінген қаражатты игеру, көгілдір отынды кіргізу мәселесі, аудандық поштаның жұмысы, баспасөз беттеріне жазылу, атаулы әлеуметтік көмектің берілуі, медициналық қызметтің сапасы сөз болып, бірнеше бөлім басшылары толыққанды жауап берді.
Облыстық ұлттық бюроның штаб басшылары жиыннан кейін аудандағы орталық аурухананың бүгінгі тыныс-тіршілігімен танысты. Шындос Мырзалиев жетекшілік ететін ақ халаттылармен кездесіп, жұмыс барысы бойынша пікір алмасты. Пікірталас барысында медицина мамандарын тұрақтандыру, біліктілігін арттыру, жас дәрігерлерге берілетін алғашқы жәрдемақы жайында сөз қозғалып, аурухананың цифрландыру жүйесіне көшу жұмыстары тексерілді. Сапар соңында цифрландыру жүйесіне өткен жылдың желтоқсан айынан бастап көшкен аурухана жұмысына оң баға берілді.
Мобильді топ мүшелері келесі күні Көгершін ауылында болып, тұрғындарды толғандырып жүрген сауалдарға толыққанды жауап қайтарды. Аталмыш жиынға Құмарық, Көкдөнен және Ақниет ауылдық округінің тұрғындары да арнайы келіп, әрбір сала мамандарынан кеңес алды. Жоғарыда аталған округ тұрғындарының көбісі кәсіпкерлік саласының маманымен ұзақ әңгімелесті. Себебі биыл облыстағы жасы 29-дан аспаған жастарға кәсіп ашу үшін, 300 000 000 астам қаражат бөлініп отыр. Дәлірек айтар болсақ, ауданда бұрын соңды болмаған иновациялық жобаны әзірлеп, арнайы комиссияның қолдауына ие болсаңыз, әрбір жасқа 3 000 000-ға дейін қайтарымсыз грант берілмек. Сала маманы тұрғындарға жобаны әзірлеу үлгісі, қажетті құжаттарды жинақтау тәртібін түсіндірді.
Аудан жастары мен тұрғындарын ақпараттандыруға бағытталған шара түстен кейін Луговой және Өрнек ауылдық округтерінде жалғасын тапты. Оған ауданға қарасты қалған округтердің барлығы қамтылды. Мұнда да тұрғындардың бірі ауылшаруашылығы мамандарынан шаруаларға берілетін несие бағдарламалары жайында сұраса, бірі ТарГУ, Жамбыл политехникалық және Абай атындағы Жамбыл гуманитарлық коледжінің өкілдерімен ұзақ кеңесіп, өздеріне керекті ақпараттарға қанық болды. Сонымен қатар, тұрғындарға «Дипломмен ауылға», «Серпін», «Бизнестің жол картасы», «Жастар практикасы», ауылшарушылығы, кәсіпкерлік бастамаларды қолдау, білім, жұмысқа орналасу, дін, ауыл шаруашылығы саласын мемлекеттік қолдау тетіктері, мемлекеттік қызметке орналасу тәртібі және өзге де салаларды қамтыған мәселелер бойынша ақпараттық-түсіндіру жұмыстары жүргізілді.
Нұрай ЖАЙЛАУБАЙ,
Жәнібек БАЗЫЛБЕКОВ.