Әліппемен қайта қауышамыз

520 Views

Білім саласындағы кейбір ре­фор­малар ұстаздар қауымын да, ата-аналарды да мазалап келгені жасырын емес. Әсіресе, әліппенің оқу жүйесінен алынып тасталуы мен ағыл­шын тілінің бірінші сыныптан оқытылуы көпшіліктің көңілінен шықпаған еді. Республикалық та­мыз кеңесінде аталған мәселелер­дің түйіні тарқады. Кеңесте Білім және ғылым министрі Асхат Аймағанбетов әліппенің мек­теп­терге қайта оралатынын жет­кізді. Енді 2021 жылдан бастап әліппе Ахмет Байтұрсыновтың қазақ тіліне негізделген әдістемесі негізінде дайындалып, мектептерге жол тартады. Бұл әрине көңіл қуантады.
Тамыз конференциясында Президент Қасым-Жомарт Тоқаев білім саласының алдағы бағыт-бағдарын айқындап, ақ-қарасын ажыратып берді. Президент «Әр халықтың ана тілі – білімнің кілті» – дейді академик Ахмет Жұбанов. Бұл сөз біз үшін негізгі ұстанымға айналуы тиіс.
Тұңғыш Президентіміз Нұрсұлтан Әбішұлы Назарбаев «Қазақ тілі үш тілдің біреуі болып қалмайды. Үш тілдің біріншісі, негізгісі, бастысы, маңыздысы бо­ла береді» деп өте өнегелі ой айт­ты. Сондықтан, ағылшын тілін оқытуды 2-3-ші сыныптан немесе ата-аналардың қалауына қарай 5-ші сыныптан бастау орынды әрі тиім­ді болады деп санаймын. Ал, жоға­ры сыныптарда жаратылыстану-техникалық пәндерді мектептер­дің дайындығына қарап жүргізу қа­жет» дей келіп, Ел Үкіметі қолға алған «Білім мен ғылымды дамы­ту­дың мемлекеттік бағдарламасын» халықпен кеңесіп, талқыдан өткізу керектігін атап өтті. Сондай-ақ, мұғалімдердің айлығын төрт жыл­да екі есе ұлғайту жөнінде Үкімет­ке тапсырма берді. Бұл да мұғалім­дер үшін жағымды жаңалық болды.
Тамыз кеңесінде мұғалімдердің мәртебесі, білімнің сапасы мен ба­ла тәрбиесі де назардан тыс қал­ған жоқ. Биылғы конференциядан білім беру саласының түбегейлі өз­герістерге бет бұрғанын көріп, қуан­дық. Президент баяндамасын­да «Сіздер еліміздің болашағы үшін аянбай еңбек етіп келесіздер. Ұлағатты ұрпақ тәрбиелеу – аса жауапты әрі күрделі міндет. Сондықтан, білімі терең, ойы озық ұрпақты тәрбиелейтін мұғалімдер қауымына зор жауапкершілік жүктеледі» деп ұлт тәрбиелеуші ұстаздар қауымына жауапкершілік жүктеумен қатар, мәртебесін биіктетті.

Сәуле Суранчиева,
Болтай батыр атындағы орта мектептің бастауыш сынып мұғалімі.

Поделиться ссылкой: