Құланның қайсар қыраны

537 Views

Қыркүйек айының 14 мен 22-сі аралығында ел астанасы Нұр-Сұлтан қаласында күрес түрлерінен (грек-рим, еркін күрестен ересектер және әйелдер арасында) әлем чемпионаты өтетіндігі белгілі. Мақтанышпен айта кетерлігі, айтулы додада қос бірдей даңқты жерлестеріміз бақ сынайтын болады. Біріншісі, талай байрақты бәсекелерде белдесіп, тәжірибе жинаған Қазақстанның 3 дүркін чемпионы Әділет Дауланбаев болса, екіншісі, биыл Қытайдың Сиянь қаласында өткен Азия чемпионатында ел қоржынына қола жүлде салған жас пері Әлішер Ерғали екенін айту ләзім. Жақында 97 келі салмақ дәрежесінде белдесетін ұлттық құраманың белді мүшесі Әлішер Ерғалиға «Уатсап» желісі арқылы байланысқа шығып, сұхбат алған едік. «Аламан» айдарының кезекті санында сұхбаттың жазулы нұсқасын назарларыңызға ұсынып отырмыз.

– Әлішер, тамыз айы да түгесілу­ге жақын. Келесі айда ел астанасында күрес түрлерінен әлем чемпионаты басталады. Жалпы еркін күрестен Әсет Серікбаев баптайтын ұлттық құрама жігіттерінің дайындығы қалай жүріп жатыр?
– Дайындығымыз жоспарлы түрде жоғары деңгейде өтіп жатыр деп айта аламын. Дегенмен, адамның дегені емес, Алланың қалауы болады ғой. Бұйыртса жарақаттан аман болсақ, барлығы ойдағыдай болуы керек.
– Өзіңмен әлеуметтік желіде сөйлесіп тұрамыз. Жуырда Польша елінде ел абыройын тағы бір мәрте асқақтатып, чемпион атан­дың. Мен сенің жетістіктеріңді жақ­сы білгеніммен, жерлестеріңнің көпшілігі ол деректерден бейхабар екенін естіп жүрмін. Сондықтан жетістіктерің турасында сөз қозғайықшы…
– Өзім айтсам мақтанғандай бола­­мын ғой. (Күлді). Дегенмен қолқалап сұ­ра­ған екенсіз, айтайын. 2016 жылғы Ка­дет­­тер арасын­да ел чемпионы болдым. 2018 жы­лы жастар арасында да Қа­зақстан бірін­шілі­гі­нің чемпионы және әлем чем­пионатының күміс жүл­дегері атандым. Биыл Шымкент ша­һарын­да өткен ересектер арасындағы Қа­зақстан чемпионатында да тұғыр биі­гі­нен көріндім. 2016 — 2018 жылғы Азия біріншіліктерінің күміс және қола жүл­де иегерімін. Қазіргі таңда Әл-Фа­ра­би атындағы Қазақ ұлттық универ­си­теті денешынықтыру факультетінің сту­дентімін. Халықаралық дәрежедегі спорт шеберімін десем, жеткілікті бо­латын шығар.
– Әрине жеткілікті. Келесі сұ­рақ­ты өзге арнаға бұрсақ. Сәуір айында Қытайдың Сиянь қаласында өткен Азия чемпионатында еркін кү­рес­­­­тен ұлттық құрама балуандары 2 ал­тын, 1 күміс және 2 қола жүлде ен­­ші­леп, айтарлықтай нәтиже көр­сетті. Оның ішінде өзің де барсың…
– Жасыратыны жоқ, ол тамаша көрсеткіш болды. Жалпы, ұлттық құраманы баптайтын Әсет Серікбаев ағамыз білікті бапкер ғой. Кім біледі. Бұл — спорт. Әлем чемпионатында осын­­дай нәтиже көрсетіп жатсақ, ел абы­ройының асқақтағаны емес пе? Біз бозкілемге ақша немесе атақ үшін емес, қарға тамырлы қазақтың намысы үшін шығамыз.
– Ой бәрекелді! Мына сөзің жа­сыған жанға жігер сыйлайтын сүбелі сөз болды-ау деймін. Дәл осы сөзден кейін менің ойыма мынадай сұрақ келіп отыр. Сияньдағы жарысты бәр сәт еске түсірейікші. Тәп-тәуір белдестің. Бірақ сенің жолыңа ирандық балуан Реза Яздани тос­қауыл қойды. Жеңілісті қалай қа­былдадың?
– Өмір жалғасады. Сөз арасында да айтып кеттім ғой. Бұл – спорт. Бірде же­ңесің, бірде жеңілесің. Осының бә­рін төзіммен қабылдай білу керек.
– Егерде әлем чемпионатында қайта жолығып жатсаң жеңуің мүмкін бе?
– Жалпы, Азия чемпионатында 3 мәр­те боз кілемге көтерілген бола­тын­мын. Ал­ғаш­қы айналымда корей балуанымен күре­сіп, 6:2 есебімен ұт­тым. Одан кейін атағы­нан ат үркетін әлемнің 2, Азия чем­пионаты­ның 7 дүркін чемпионы, даңқ­ты Иран ба­луа­ны Реза Язданимен бел­де­сіп, 7:3 есе­бі­­мен ұты­лып қал­ған едім.
– Әлішер сөзіңді бөлгеніме айып етпе, мен сол белдесуді «Youtube»-тан іздеп, толық нұсқасын көріп шықтым. Сен сәт­ті өнер көр­сет­кен­сің негізі…
– Рақмет, жылы пікіріңізге. «Нұр-Сұлтанда» жолымыз түйісіп жат­са, Сиянь­да кеткен есемді қай­тару­ға ты­рысамын. Жалпы, ел ас­тана­сын­да өтетін әлем чемпионатында жұр­тшы­лық жадынан өшпейтін із қалдыр­­ғым келе­ді. Әлішердің қандай күрес­кер екені­не елдің де назарын аудар­сам дей­мін. Сол үшін де барымды са­лып, күресетін боламын.
– Әлішер, сенің бойыңдағы бұла күшті, боз кілемде еркін көсілетін шеберлігіңді отандық баспасөздер­дің біріне берген сұхбатында еркін күрестен ұлттық құраманың бас бапкері Әсет Серікбаев та жоғары бағалаған еді. Сенім үдесінен шы­ғып, мемлекеттік Туымызды көк­те желбіретесің деген ниеттеміз. Сұх­баттасқаның үшін алғыс білді­реміз. Абыройлы бол!

Әңгімелескен Марат Диханбай.

Поделиться ссылкой: