Құқық қорғау саласы қаржыландырылады

724 Views

Мемлекет басшысы Қасым-Жомарт Тоқаевтың халыққа жолдаған Жолдауында көптеген мәселелер қозғалды. Солардың ішінде құқық қорғау саласына айтарлықтай көңіл бөлінгенін анық аңғаруға бо­лады. Атап айтар болсақ, ел Пре­зиденті өз Жолдауында «Құқық қор­ғау жүйесін толық реформалау – аса маңызды міндеттердің бірі. Поли­цияның мемлекеттік күштік құрылымындағы бейнесі бірте-бірте өзгеріп, қауіпсіздікті қамтамасыз ету үшін азаматтарға қызмет көрсететін органға айналады. Полицейлер жұмысының тиімділігі полиция қызметінің беделді бо­луы­на байланысты. Ішкі істер ми­нистр­лігін реформалауға алдағы үш жыл ішінде 173 миллиард теңге бөлі­неді» — деп атап өтті. Ел қазы­на­сы­нан бөлінген қомақты қаражат осы салада қызмет ететін мамандардың еңбекақысын көбейтуге, баспананы жалға алуға, халыққа қызмет көрсету қағидаты бойынша полицияның заманауи фронт-офистерін ашуға жұмсалатынын жеткізді.
Қасым-Жомарт Кемелұлының Жолдауында айтылған тағы да бір мәселелердің бірі — азаматтардың негізгі құқықтарын назардан тыс қалдырмау. Мемлекет басшысы бұл жөнінде «Жыныстық зорлық-зомбылық, педофилия, есірткі тарату, адам саудасы, әйелдерге қатысты тұрмыстық зорлық-зомбылық және басқа да ауыр қылмыстарға, әсіресе, балаларға қатысты қылмыстарға қолданылатын жазаны шұғыл түрде қатайту қажет» — деп, аталмыш мәселені шешуді Парламент пен Үкіметке тапсырды.
Сонымен қатар, өз басым Прези­денттің Жолдауындағы азамат­тардың құқықтары мен қауіп­сіздігін қамтамасыз ету, сыбайлас жемқорлықпен жан-жақты күресу мәселелері бойынша айтылған бастамаларын толығымен қолдаймын. Қолдап қана қоймай, еліміздің азаматы ретінде оны орындауға, межелі міндеттерді өз мәресіне жеткізуге барынша атсалысатын боламын.

Шалқар Дәулетқұлов,
аудандық полиция бөлімі бастығы­ның орынбасары.

Поделиться ссылкой: