Құқық бұзушылық саны азайып келеді

499 Views

Сәрсенбі күні Қазақстан Респуб­ликасы Ішкі істер министрлігінің бекі­тіл­ген кестесіне сәйкес «Сұлутөр» кино­театрында жиын өтіп, онда 2019 жылдың 8 айының қорытындысы нәтижесінде ау­дан аумағында жедел ахуалдың жағдайы және осы аталған мерзімде аудандық полиция бөлімінің жеке құрамымен атқарылған жұмыстардың тізбегі баяндалды. Жиын барысында баяндама жасаған аудандық полиция бөлімі басшысының орынбасары Дар­хан Абикуловтың айтуынша, аудан аумағында құқық бұзушылықтардың алдын алу, ескерту, қоғамдық қауіпсіздік пен жол қауіпсіздігін қамтамасыз ету мақсатында кешенді іс-шаралар ұйым­дастырылып отырған. Атап айтатын болсақ, «Құқықтық тәртіп», «Автобус», «Қашар», «Уылдырық», «Борышкер-2019», «Жолда қабылдау», «Допинг», «Есеп», «Мал ұрлығы», «Стоптрафик», «Қару», «Қаңғыбас», «Мигрант», «Абайлаңыз, балалар!», «Учаске», «Пробация», «Қауіпсіз аула», «Тұрмыс» секілді қылмыс пен басқа да құқық бұзушылықтардың алдын алу мақсатында іс-шаралар өткізілген екен. Сондай-ақ, баяндамашының сөзіне сенсек, орын алған қылмыстар мен жол көлік оқиғаларына талдау жасалып, мұндай аймақтарда барлық жеке құрамды тарта отырып, локальдық жедел алдын алу шаралары жүргізілген көрінеді.
Айта кетейік, 2019 жылдың 8 айында жүргізілген жүйелі жұмыстардың нәтижесінде аудан аумағында жалпы 145 қылмыстық құқық бұзушылық тіркеліп, оның пайыздық өлшемі 15,7 процентке төмендеген. Былтыр бұл көр­сеткіш 172 болған. Баяндамашы өз сөзінде ауыр және аса ауыр — 15, ауыр дәрежеде — 14, орта дәрежеде — 87, ауыр емес дәрежедегі қылмыстар саны — 29 болғанын тілге тиек етіп, қылмысты болдырмауға полиция бөлімі тарапынан көптеген жұмыстар атқарылып жат­қандығын айтты. Жиын соңында Қара­қат ауылының тұрғыны Үмбет Жана­ділов мал ұрлығы мен жалпы аудан­дағы жастарымыздың тәртіп мәсе­лесін көтерді. Өз кезегінде Дархан Абикулов ақсақал қойған сауалдарға заң жүзінде үн қатып, жан-жақты мысалдармен жауап берді.

Марат Жолдасбекұлы.

Поделиться ссылкой: