Аудан әкімі жаңатұрмыстықтармен кездесіп, пікірлесті

682 Views

Өткен жұмада облыс әкімі бекіткен жұмыс алгоритміне сәйкес аудан әкімі Ерболат Садырқұлов Жаңатұрмыс ауылдық округіне барып, бірқатар әлеуметтік нысандарды аралап көрді. Ерболат Салқынбекұлы барған алғашқы мекеменің бірі — ауылдық дәрігерлік амбулатория ғимараты болды.
Негізінде, Ерболат Садырқұлов ал­ғаш әкімдік тізгінді қолға алған сәт­те аталмыш мекемеге келген бола­тын. Сол мезетте күніне 25 науқас қабыл­дай алатын Жаңатұрмыс ауыл­дық дәрігерлік амбулаториясы ғима­ра­тының аянышты халін көріп, тиісті сала басшыларына тапсыр­ма жүктеген еді. Қазіргі таңда ауылдық емхананың жағдайы бір­шама жақсарыпты. Жүктелген тапсырма өз уақытында орындалған. Алайда, мұндағы абаттандыру мен көгеріштендіру жұмыс­тарына мүлде көңілі толмай­ты­нын жеткізді. Жаңатұрмыс ауылдық дәрі­­герлік амбулаториясының аға дәрі­гері Эльмира Естемесова ай­тыл­­ған сынды алдағы уақытта еске­ріп, жұмыс жасайтынын айтты. Жалпы, Жаңатұрмысқа жаңа дәрі­герлік амбулатория ауадай қажет. Өйткені, қанша жөндеу жұмыстары жүргі­зілгенімен, іргетасы 1962 жылы қаланған ауыл емханасының жай-күйі тым жұпыны халде тұр. Дегенмен, осы жағдайға қарамастан емхана қызмет­керлерінің істеп жатқан еңбектеріне ауыл халқы дән риза. Дәрі-дәрмек тапшылығы мұнда ешқашан болған емес.
Одан кейін, Ерболат Салқынбекұлы Жаңатұрмыстағы басты білім ордасы болып есептелетін Қаныш Сәтпаев атындағы шағын орталықты орта мектеп ғимаратына бас сұқты. Балалар әдебиетінің көрнекті өкілі Әдібай Табылды, ақын, Халықаралық «Алаш» әдеби сыйлығының лауреаты Қуандық Шолақ сынды талантты тұлғалар білім алған аталмыш білім мекемесінде оқимын деген оқушыға барлық жағдай жасалған. Яғни, мұнда айтарлықтай проблема жоқ. Биыл ұлттық біріңғай тестілеуде Қаныш Сәтпаев атындағы шағын орталықты орта мектептің түлегі Фатима Әміралиева 136 балл жинап, аудан бойынша ең жоғары көрсеткішке ие болғанын жақсы білесіздер.
Аудан басшысы Жаңатұрмыс ауылындағы мектеппен жапсарлас орналасқан «Құлыншақ» балалар бөбекжайының ғимаратына да барып, бөбекжай меңгерушісімен пікірлесті. «Құлыншақ» балалар бөбекжайында бүгінгі таңда 115 бала тәрбиелену үстінде. Алайда, ауыл әкімі айтқан дерекке сенсек, 20-ға жуық бала кезекте тұрған көрінеді. Бөбек­жай меңгерушісі Гүлнәр Уалиева бұл мәселе спорттық үйірмені жаңа ғима­ратқа қоныстандырғанда ғана оң­тайлы шешілетіндігін айтады. Бірақ, ауыл жастарына спорттық үйір­ме де керек. Әңгіме барысында ау­дан басшысы бұл мәселені алдағы уақыт­та өзінің назарында ұстайтынын айтты. Бұдан өзге бөбекжайға күрделі жөндеу жұмыстары 2010 жылы жүргі­зілгенімен, ғимарат терезелері қатты дауыл соққанда тарсылдайды екен. Осы кезде балалардың дегбірі қашатын көрі­неді. Бұл мәселе төңірегінде ауылдық округ­тің әкіміне тиісті шаралар қабыл­дау керектігін ескертті.
Ерболат Салқынбекұлы Жаңа­тұрмыс ауылындағы батыр Бауыржан Момыш­ұлының есімі берілген көшеге ар­найы барып, кетеуі кетіп тұрған көшенің жағдайын өз көзімен көрді.
Аудан басшысының бекітілген алго­ритмге сәйкес жоспарланған жұ­мыс кестесі ауылдық әкімдік ғима­ра­тында өткен жиналыспен қоры­­тындыланды. «Межеленген кес­те бойынша мен бүгін сіздердің ауылдарыңызға ат басын бұрып отыр­мын. Бұған дейін ауылдағы бір­қатар әлеуметтік нысандарды аралап, қазақ халқының даңқты батыры Бауыржан Момышұлының атына берілген көшенің жағдайын өз көзіммен көрдім. Жалпы, алғаш әкімдік қызметке тағайындалған кезде мен бұл ауылға келген едім. Одан кейін де бірнеше мәрте болдым. Айтайын дегенім, Жаңатұрмыс ауылындағы өзекті мәселелер менің басты назарымда» деді Ерболат Салқынбекұлы жиналыстың әуелгі сөз басында. Содан соң, ауыл әкімі Нұрболат Жамалбеков ортаға шығып, қысқаша баяндама жасады. Ол өз сөзінде ауылдық округтегі халықтың саны 2620 екендігін, мемлекеттік «Өңірлерді дамыту бағдарламасы шеңберінде атқарылған ауқымды жұмыстар тізбегін және салық түсімдерінен жиналған қаражаттың жалпы жиынтық сомасын атап өтті. Бір сағаттан астам уақытқа созылған жиналыста көптеген пікірлер айтылды.
Жаңатұрмыстағы басты пробле­малардың бірі газ бен ауыз су мәселесі. Аудан басшысымен еркін пікір ал­масу форматында өткен жиында ауыл тұрғындары бірінші кезекте осы мә­селелерді тілге тиек етті. Қойылған сауалдарға аудан әкімі кеңінен сөз қозғай отырып, нақты мысалдармен жауап берді. Айтылған ұсыныстың барлығы хаттамаға түсіріліп, тиісті сала мамандарына тапсырмалар жүктелді.

Марат Диханбай.

Поделиться ссылкой: