Халықтық атағын қорғап қалды

783 Views

Өнер – кез келгенді мойындатып, көпшілікті тәнті етер ерекше қасиет. Адамға өнер табиғаттан берілмесе, жүре пайда болуы, қолдан жасалуы мүмкін емес. Қазақ өнерді қадірлеген халық. Ән өнері, би өнері, сөз өнері, сурет өнері, қолөнер және театр өнері секілді өнердің түрлері көп. Әр мемлекеттің айбыны асқақ, рухы биік болуы үшін оның спорты мен мәдениеті қатар дамуы тиіс. Спорт пен мәдениеттің арқасында сол мемлекетті әлем тани алады, мойындайды.
Әрине, қазақ мәдениеті әлемді бір­неше мәрте мойындатқан деуімізге толық негіз бар. Дауысы бүкіл Парижді аузына қаратқан әнші Әміре Қашаубаев, бұлбұл үнді Күләш, Роза, Бибігүлдер, «Ұлытау» тобы, күні кеше әлемді таң­қалдырған Димаш Құдайбергеновке дейінде небір өнер майталмандары өмір сүрді. Ауданымыздағы Мэльс Өзбеков атындағы мәдениет үйінің өзінде бірнеше «халықтық» атағы бар ансамбльдер бар. Мәселен, Түркияны тамсандырған «Әдемі-ау» ән-би ансамблін айтуға болады. Құрамында 104 қызы бар би тобының жетекшісі Ләззат Жайсанбаеваның аудан мәдениетінде сіңірген еңбегі зор. Сонау жылдардан бері келе жат­қан «Сұлутөр» халықтық ән-би ансамблі мен «Сұлутөр» халықтық вокалды-аспапты ансамблін де аудан жұртшылығы жақсы таниды. Сондай-ақ, өз тыңдаушысын тапқан «Сударушка» фольклорлық ансамблі де «халық­тық» атағына ие. Ал құрылғанына ұзақ уақыт болмағанымен, бірнеше қойы­лымдарын көрермен назарына ұсынып, халықтың ыстық ықыла­сына бөленген Б.Битанов атында­ғы халықтық театрдың орны тым бөлек. Сонымен бірге, ауданымыз­дағы этномәдени орталықтар­дың бірі – «Эльбурс» қарашай этно­мәдени ән-би ансамблі де өз өнерімен ерекшеленуде. Аталған өнерпаздардың барлығы да күні бүгінге дейін «халықтық» атағына ие болып келсе, күні кеше осы атақты барын салып қорғап шықты. Тіпті, олардың өнеріне тамсанған облыстан келген комиссия мүше­лері орындарынан тік тұрып қо­ше­мет көрсетті. Әрине, мұның бар­лығы – ауданымыздың ауыз толтырып айтар жетістігі мен мәдениет бөлімі­нің үздіксіз еткен еңбегінің жемісі деп білеміз.Суреттерде: «Сұлутөр» халықтық ансамблі; «Әдемі-ау» халықтық ән би ансамблі; Басқар Битанов атындағы халық театры; Қарашай этно-мәдени ансамблі; «Сударушка» халықтық фольклорлық ансамблі сахнада өздерінің халықтық атағын қорғауда.

Салтанат Қарасай.

Поделиться ссылкой: